Read nya huba 2 Bitrus 1 Bible Online

2 Bitrus 1 - nya huba bible

2 Bitrus 1

¹Hya'atə tsa Shiman Bitrus, mava ana changhabal nə Yesu Kəristi, yi nə nji'inda dləutsə jirikur nda na sakəda wi nəkə ea, təwa tsa'atsa'akur nə Hyel kəmən ana Yesu Kəristi Ndər Dləuya mən.

²Papa'akur ana piyarɗufəu cha ɗa nəkə hi təwa zəndəbiya Hyel ana Yesu Tlakən mən.

³Hyel ku gyalkur nyi tə nə mən dəhə sənda məno gwa'a, ka ga məna ngya kəmən wi chulkə nə nji'inda kwa ləvər Hyel, təwa zəndəbiya ndə nda tə nga mən, ka ga məna təkəya səli nyi ana mənakəkur nyi.

⁴Təwa səli nyi ana mənakəkur nyi cha nə mən wawa'ar alkawal nyi nda na sakəda, aka ga hya mbəɗə tsa ɗimikur nə dunəya nda ndəkurndə kwa gwa'ati.

⁵Aka ənga, hya mbadzə hya tsakəkəri mənakəkur təkəra jirikur kəhi, a təkəra mənakəkur tsəu hya tsakəkər zəndi.

⁶A təkəra zəndə tsəu, hya tsakəkər mbiyahuɗəu, a təkəra mbiyahuɗəu hya tsakəkəri səsə'ua, a təkəra səsəu kəhi hya tsakəkər mər sənda Hyel kwa i.

⁷A təkəra mər sənda Hyel kwa i tsəu, hya tsakəkər i njir nəuwa, a təkəra i njir nəuwa hya tsakəkər nyida.

⁸Ma chul sə'ingə tə ɗa ka ngyakəngya kəhi, zəndə Tlakə Yesu Kəristi nda hi nə kwa gwa'atə hyo mbadza, ya hyo ɗa ka njir sakəda.

⁹Kəl ja, macha a da hi nə wa, hyo ɗa ka nji'inda pa'a kwa la'a sə gagaɗa, njir wuləfəu. Ya fartə hi ənda nja chinda hi tsa səpəla'a kəhi nda haaɗa nda.

¹⁰Aka əngə ja, ka zamə ɗa i'i, hya mbadzə tsa'anyata ka ga hya char ənda ku huɗa nji'inda nja nga ga ɗəmtsə hi, ma hya mər ənga a da hyo təkə na jirikur kəhi wa.

¹¹Təwa ənga, hyo uya dimukur nə gwa ku təlkur nda ba'anawa nə Tlakən mən Yesu Kəristi Ndər Dləuya.

¹²Aka ənga, yo maka ɗənghatəhi sə'inga, madangə wurtə hya zəndi, ya chiya təhi ngilang ku ɓwanya jiri nda hya dləutsi.

¹³Aku la'a ɗa, tsa'atsa'a tanyi macha tsə'uta ɗa na pi ya ɗənghatəhi sə'inga.

¹⁴Aka zəndətə ya kacha'anə bəji ɗa kwa wura, wi nda Tlakən mən Yesu Kəristi tə char ɗa.

¹⁵Yo mər dəhə ənda yo ɗa, ka ga ya ɓatliya hi laku nda hyo ɗənghatə sə'ingə wa'atanyi ahir ya tah.

¹⁶Mafakə nda ea nə hi təkəra shilir Tlakən mən Yesu Kəristi na gyalkur nda, a da pəkətəpəkətiya nda nji tə ɓatliya na dəma kənda nda wa. A'a! Ana lya ea ea la'a səli nyi.

¹⁷Aku bəji nda cha dləutsə səli tsa Hyel Ada tsəu, tangnda ea. Ea ngatə kuraka Hyel Ndər Səli ndə nda ndiya na dəgalkur tə na, “Nənnə ngə Zər ɗa nda yo nyida. Yo mər hirgyaɗi nacha gagaɗa.”

¹⁸Naea na kərnəea ngatə tə kurakəu tə səya kya huɗamələm, ku bəji nda ea kə'i cha kyo mə karti nda.

¹⁹Sə'inga tə ɗa tsa'atsa'a na ɓwanya nda njir mətakər tə ɗaka dəkə nda. A kitə hyo kina ɗana jigadəma kəhi tsa'atsa'a ku ɓwanya nga, aka ɗatə wi təkəsə nda kwa mbəl ku mbwa kutləkutlə tsa'a ku wurəvi, ku bəji nda sasəlga disha wurəvi kwa mbəl ku ɗufwa hi.

²⁰Kəl ja, tangərma, hya ɗənghatə ənda ndə da kwa nau dəkəbiya dəhə ɓwanya mətakər nda ku likatəkatə wa.

²¹Aka ɓwanya mətakər da ta shili təwa dəma ndə wa, kəl nda Shanguɗə Karti nə Hyel ngə kwa gəla nji, kwa gwa'atə nda kwa dəkə sənda nda dləutsə tsa Hyel.