Read nya huba 2 Bitrus 2 Bible Online

2 Bitrus 2 - nya huba bible

2 Bitrus 2

¹Njir mətakər gəzhi tə shili ku pama nji haaɗa, əngə tanyi tsəu njir dlədləɓə nə gəzhi kwa shili ku pama hi. Nda kwa shili na vanya dlədləɓətə ɗəwa, nda kwa dlədləɓətə nyi gəzhi nə nji, sə'indo gwa'atə nda kwa sa. Nda kwa ngyar Tlakə nda pəliya pya nda. Təwa ənga nda kwa təɗəkənyi tah ma'a nə kərnənda.

²Madangə nji ɗang tsəu kwa nəu dlədləɓə gəzhi kənda, sənda nda kwa mər kwa gwa'atə alenya nji kwa pə ɓwanya ɗimi təkəra laku jiri.

³Təwa huɓursə nda nya ta njir dlədləɓə nə gəzhi inda, nda kwa mbadzə kanda uya zhar təwa pəkətəpəkətiya nda nda ɓatliya na dəmar kəra nda, ya nəuma kənda ba'a, kwa səkə nda.

⁴Mada chama Hyel i'i haaɗa nda nda mər bikəu, Hyel da ngya nda wa kəl nda cha bəzəu nda gu hu'u tangnda cha mbiya nda na dzəra lyang ku kutla, nda kwa səkə pəchir nəuma.

⁵Ya ku bəji nda haaɗa nda nji tə mər səɗimi, Hyel da ngya nda wa, kəl ja, cha shili na mandza tə dunəya təkəra nji kəla nəu nya Hyel, wuɗəkər nji'inda cha mbəɗandə kəl Nuhu ndər bəzə mafakə tsa'atsa'akur ana nji məɗəfə inda.

⁶Hyel tə zhazhinda hə'i Sodom ana Gomora na hu'u ga shandə nda ka pətsəɗəu. Cha mərtə nda ka ba'ada nə sənda kwa ɗana nji kəla nəu nya Hyel.

⁷Kəl ja, Hyel tə mbəɗandə Lot, ndər mər sə tsa'atsa'a, ndə nda huɗa cha tlatlanyi tsa səɗimi sər kuzhi nda nji kəla nəu gadlagadla kwa məra.

⁸Ndər mər sə tsa'atsa'a nda tə ngya ku pama nda, ya ənya əzəkəu ɗufwa cha kwa nginyi ma cho la'a ana ngatə ɗimikur nda nda kwa məra.

⁹Aka ənga, Tlakə zəndətə ənda cho ɗana mbəɗandə nji'inda kwa nəu nya Hyel tsa dzə nda kwa shili nənda i'i, ana ənda cho ngyar nji ɗimi ku ɓwaɓwatəu ka bəjir nəuma.

¹⁰A da wi nji'inda kwa nəu jigadəmar kasalikur nda dza nda kwa i ana nji'inda kwa həyatə njir təlkur wa, nəuma kənda kwa ɗa tədəɓə gagaɗa. Njir dlədləɓə nə gəzhi inga kuzhi do lya nda pa'a wa, nda kwa həkəra kərnənda, a da nda kwa la'a səlir nji'inda na səli kya huɗamələm wa, ma'a ngəl nda kwa ngəl nda.

¹¹Mada chama Hyel inda na dunama ana gyalkur matsa njir dlədləɓə nə gəzhi, dəhə ka ənga, a da nda kwa fəkə nda bikə ndara nda ngəl nda mar Hyel wa.

¹²Kəl ja, nji inga kwa pə ɓwanya ɗimi təkəra Hyel ku sənda anda ngabiya wa, wi kum takə nda nja mər ka nja səya nja tsəya nda, ya nda kwa kuɗə wi kum takəu.

¹³Ya njo nənda ɓwaɓwatə wi nda nda nənyi nə nji. Nda hətə sa səsasa ana zazaɓəkur sə mənakə cha, nda kwa mər ma pəchi tangkər. Ngya kənda ku pama hi sər kuzhi cha, ya səɗimi tsəu, nda kwa səm kə'i hi, kəl ja, a hinə hi nda kwa mər sənda nda kwa i.

¹⁴Səda nda kwa gwa'a matsa lakur mər kasali wa, mwaɓər dza nda da kwa nyi na mər səpəla'a wa, nda kwa titir nji'inda na kushir jirikur yo ləbam, a dləbiya tənda taku ku huɓərsəu,[1] nda kwa ngya tə kiɗa shi'ur Hyel.

¹⁵Ngyar tənda laku duru ga nəu mbwar hya Bala'am zər Beyor nda kwa i cha uya kwaba ku mər səɗimi.

¹⁶Kəl ja, ta'ində tənji Bala'am ndər mətakər tsa mər səpəla'a ku bəji nda kwara nyi tə tsə nyi na kurakər ndəu tsa məlləmkur.

¹⁷Nji inga wi muhuɓiti shi'ushi'u nda, wi salpar nda gyang kwa ma'i ni, jiri Hyel ɓatliya nda tə mbwa ku kutlə kyakyarəu.

¹⁸Nda kwa pə ɓwanya kərakər nə həkəra kərnənda, nda kwa titir nji'inda kwa gwa'a ngyar lakur bikəu, yo lakur səpəla'a səkəu.

¹⁹Nda kwa mərtə nda alkawal dimukur, ya kərnənda mavi'i mər sə zazaɓə nda, aka ndəu, mava cha anə dəhə sənda kwa gəla nyi.

²⁰Ma nja mbəɗə tsa mər sə hiɗahiɗa nə dunəya nə təwa zəndə Tlakən mən ana Yesu Kəristi Ndər Dləuya, ahir ənga nda ɓəl ya kwa ya ngə a gəzəya ɗufwa nda, nda kwa ɗa sər təhuɗə matsa nda haaɗa.

²¹Bəliya cha nda ɗa a da nda zəndə lakur ngya tsa'atsa'a wa, tsa wi ngə nda zəndə ga ngyar nəu tsaubar karti nda nja nənda

²²Səngə nda mər nga ɗatə tsa'atsa'a na kərapəu nda kwa na, “Həya kwa chiɗəkəya chiɗəka kwa ɓəla sha kwa naɗəti,” ana “Dagəla kwa waɗa ya cho ɓəl yo tsaɓəu.”