Read nya huba 1 Yohana 3 Bible Online

1 Yohana 3 - nya huba bible

1 Yohana 3

¹Ndzam ma ənda Ada tə nyidatə mən gagaɗa nda njo nga mən nguli Hyel! Ya əngə ngə mən! Sənda gwa'atə a dunəya da kwa zəndə mən wa, aka a da cha zəndə nyi wa.

²Ka bazhi nda yo nyida, sakana nguli Hyel mən, kəl nda sənda məno ɗa kar da taa ɗa tə babal wa. Kəl ja, a zəndətə mən ma cha chabiyadza, məno ɗa wi nacha, aka məno la'a nyi wi nda təcha.

³Dəhə ndə nda na chul ngawa fəkər ku Kəristi kwa chinda kərnyi, wi nda tə cha chichinyi.

⁴Dəhə ndə nda kwa mər səpəla'a, ɓəlnda tə cha gadlagadla, jiri səpəla'a nacha ngə ɓəlnda gadlagadla.

⁵Kəl ja, a zəndətə hi ənda cha chabiyadza ka ga cha hənda səpəla'a kəmən. Ya səpəla'a da ku cha wa.

⁶Dəhə ndə nda kwa ngya ku cha da kwa mər səpəla'a wa. Ndə da tsəu nda kwa mər səpəla'a, ta la'a nyi wa, ya a da cha ta zəndə nyi wa.

⁷Ngulisha'a nda yo nyida, ngwa hya da ngyar madawa shandə hi kər wa. Dəhə ndə nda kwa mər sə tsa'atsa'a ndə tsa'atsa'a cha, wi ngə tə Kəristi ndə tsa'atsa'a.

⁸Dəhə ndə nda tə ngyata nyi ka mər səpəla'a nə sərtakə cha, aka sərtakə ndər mər səpəla'a cha fwatə ku ghəya nyi. Sənda gwa'atə Zər Hyel tə chabiyadza, ka ga cha wazənda tlər sərtakəu.

⁹Ndə da nda Zər Hyel kwa biyama na mər səpəla'a wa, aka chuli ngya nə Hyel ku cha. A da cho biyama na mər səpəla'a wa, aka Hyel ngə Ada nyi.

¹⁰Janə ənda njo ɗana ngabiya nguli Hyel ana nguli sərtakəu, kala ndə nda a da kwa mər sənda tsa'atsa'a wa, ya a da cha kwa nyida zamə nyi, a da cha Zər Hyel wa.

¹¹Nənnə ngə mafakə nda hya ngatə ku ghəyanyi, məna nyida kərnəmən.

¹²Ngwa mən da ɗa wi Kayinu nda nəu ndə ɗimi ga tsəya zamə nyi wa. Mya gwa'atə cha tsəya nya? Aka sənda cha mər tə ɗa ɗimi, ya nə zamə nyi tsa'atsa'a.

¹³Ngwa cha da ɗa sər məngəl ma dunəya tə ngya hi ka zamə ɗa wa.

¹⁴A zəndətə mən ənda hwi ta mən təmən tsa tah ya ku pi, aka məno nyida kərnəmən. Ndə nda a da kwa nyida wa, wi tətənyi cha.

¹⁵Ndə nda kwa ɗa tsa zamə nyi ndər tsa ndə cha, ya kwa zəndə hi ənda ndər tsa ndə da na pi nda ba'anawa wa.

¹⁶Jan ənda məno zəndə ndara mi ngə nyida, Yesu Kəristi tə sənda pya cha ka mən. Na mən tsə'u a kitə məna sənda pya mən ka zamən mən!

¹⁷Ma ndər gəna nə dunəya tə la'a zamə nyi ku tari, ya ngə a da cha ngatə təhuɗə nyi wa, aman nyidar Hyel kwa ɗa ku cha?

¹⁸Ngulisha'a nda yo nyida, ngwa nyida kəmən da ɗa ku ɓwanya ana a tə chimər nya tanyi wa, kəl ja, tuku cha chabiyadzə ku tlər kəmən ana jiri.

¹⁹Jan ənda məno zəndə ənda ku jiri mən, ana ənda məno ɗana ɗa ta'ita'inyi mar Hyel,

²⁰dəhə bəji nda ɗufwa mən tə char mən ənda bikə tsamən. Aka Hyel ndiya tə ɗufwa mən, ya kwa zəndə cha madami.

²¹Ka bazhi ɗa nda yo nyida, macha ɗufwa mən da char mən ənda bikə tsamən wa, dunamar ta'i da tsa mən mar Hyel.

²²Məno uya dəhə sənda məna gədi tsa cha, aka məna ɓəlatə gadlagadla nyi ga mər sənda cho i.

²³Ya jan gadlagadla nyi; məna nənyi jiri nə tləmər zər nyi Yesu Kəristi ana məna nyida kərnəmən wi nda gadlagadla nyi tə na.

²⁴Nji nda tə ɓəlatə gadlagadla Hyel kwa ngya ku cha, Hyel tsəu ku nda, ya əngə nga gwa'atə məna zəndə ənda ku mən cha na ngya, təwa Shanguɗə nda cha nə mən.