Read nya huba 2 Yohana 1 Bible Online

2 Yohana 1 - nya huba bible

2 Yohana 1

¹Hya'atə tsa ndəradəgal, yada mala nda na səli nda Hyel tə tabiya ana nguli nyi nda yo nyida ku jiri. Ya a da kəl na ya wa, ma'a nə dəhə nji'inda tə zəndə jiri,

²aka jiri nda na ngya ku ɗufwa mən, kwa ngya namən ba'anawa.

³Papa'akur, təhuɗəu ana piyarɗufəu hya'atə tsa Hyel Ada ana Yesu Kəristi, kwa ngya tsa'a namən ku jiri ana nyida.

⁴A mər təya hirgyaɗi ənda ya həya alenya ngulisha'a nghə kwa ngya ku jiri, tang wi nda Ada tə tsau mən bar.

⁵Sakanə ja mala nda na səli nda yo nyida, a da taɗər gadlagadla nə yo tsəfə nənghə wa, kəl ja, nda məna ngatə ku ghəyanyi nda na. Yo gədi mən nyida kərnəmən.

⁶Ya nənnə ngə nyida, ənda məna ngya ku nəu gadlagadla nyi, wi nda hya ngatə ku ghəya nyi, gadlagadla nyi na cha ngə hya ngya ku nyida.

⁷Njir shakər ɗanghəu, nda pa'a dləukər na ənda Yesu Kəristi tə shili ku kumur dzə tə dunəya. Chul ngəna ndəu ndər shakər nga, ya ndər dawa na Kəristi.

⁸Hya ngya na ɓəla ja, tsa mən da tar sənda məna mər tlər kari, kəl ja, ga hya uya wazəba nda tsa'atsa'a.

⁹Dəhə ndə nda a da ta'i təkəra dlədləɓə nə Kəristi wa, ya cha tsakəkəri, a da cha na Hyel wa. Dəhə ndə nda kwa biyama na ngya ku ngəna dlədləɓa, uyatə cha Ada ana Zər.

¹⁰Madawa tə shili da hi ya a da cha shili na dlədləɓə nə wa, ngwa hya da gwa na cha ku ki kəhi ndara hya lali nyi wa.

¹¹Madawa tə lali nyi, daɓətə tə nda kər ku ɗimikur nyi ndani.

¹²Səda ɗang yo i ya tsəfətə hi, kəl ja, a da ya kwa i ya mər tlər na sər tsəfə wa. A təvəra ənga, yo fəkər da yada hi ka ga ya yi ɓwanya nahi nya na nya, tsa'aka hirgyaɗi kəmən kwa nyabiyadza.

¹³Nguli kwamə nghə nda nja tabiya kwa usa ngha.