Read nya huba 3 Yohana 1 Bible Online

3 Yohana 1 - nya huba bible

3 Yohana 1

¹Hya'atə tsa ndəradəgal, yada bazhi ɗa Gayus nda yo nyida ku jiri.

²Bazhi nda yo nyida, yo pətlənya ənda ko ɗana ngya ku yiyingkur, ga dəhə sə ɗa mənakə nə ngha, wi ngə kə yiying ku shanguɗə nga.

³A mər təya hirgyaɗi gagaɗa ku nda alenya njir nəu tə shili dəkar ɗa jirikur ngha, ana ənda ka biyama na ma'i ku jiri.

⁴A vanya səda kwa na'a hirgyaɗi matsa ya ngatə ənda nguli ɗa kwa ma'i ku jiri wa.

⁵Bazhi nda yo nyida, ana jiri kə ku sənda ko mər nə ka zama, madangə mihiɓi nda nə ngha.

⁶A dəkar nyi tə nda nyida nghə nə njir nəuwa. Cho ɗa mənakə ma ka səu nda ku laku wi nda kwa ɗa mənakə nə Hyel.

⁷Aka a tə dəbar Kəristi ngə nda biya, a da nda kwa dləu vala tsa nji kəla nəu wa.

⁸Aka ənga a ɗatə mənakə məna dləutsə nji wi ingə ga məna mər tlər kə'i nda ka jiri.

⁹A tsəfətə nyi təya nə njir nəuwa, kəl ja, Diyotarifis, nda kwa i cha ɗa ka gau, səda wendə nyi na ea wa.

¹⁰Aka əngə ma ya yi, yo yi dəkəbiya səngə cho mər nga, nya zazaɓə nda cha pə təkəra mən, ana gəzhi nda cha kwa tla! Cha ngyar lali njir nəuwa. Ətsəu cha katə nji'inda kwa gwa'a məra ga gədləbiya nda ku huɗa daɓədzər njir nəuwa.

¹¹Bazhi nda yo nyida, ngwa hya da dlədləɓə səɗimi wa, kəl nda sənda mənakəu. Kala ndə nda kwa mər sə mənakə nə Hyel cha. Kala ndə nda kwa mər səɗimi a da cho zəndə Hyel pa'a wa.

¹²Madawa kwa pə ɓwanya mənakə təkəra Dimitiriyus, mada sənda cha kwa məra kwa chari ənda ndər jiri cha. Na ea təkərnəea ma'a kwa pə ɓwanya mənakə təkəra cha, ya zəndətə hi ɓwanya kəea jiri.

¹³Səda gwang nda tsa'aka yo tsəfa, kəl ja, a da yo i ya mər tlər na sər tsəfə wa.

¹⁴Yo fəkər da la'a nghə kacha'ana, tsa'aka mo ɓwanya nya na nya.

¹⁵Piyarɗufəu cha ngya naka. Ka bazhi inda tangnə kwa usa ngha. Usar ka bazhi inda hingə kər zhang kər zhang.