Read nya huba Takǝr Yohana 1 Bible Online

Takǝr Yohana 1 - nya huba bible

Takǝr Yohana 1

¹Takər nda Hyel tə nənyi nə Yesu Kəristi ka cha char nyi nə mavi'i nyi sə'inda tuku kwa ɗa kacha'ana. Cha chabiya sə'inga təwa sə chama nyi yada mava nyi Yohana,

²ndə nda tə pəbiya dəhə sə'inda cha la'a. Nacha ngə ɓwanya Hyel ana ɓwanya nda təkəra Yesu Kəristi.

³Ndə papa'a ngə ndə nda tə kəratsəntə ɓwanya mətakər na, ya papa'akur ngya tə nə dəhə nji'inda tə ngatə sə'inda tsəfətə nji kwa, aka bəji ɗatə ləhəu.

⁴Hya'atə tsa Yohana ana tsa shanguɗə məɗəfa nda mar dzəga təlkur Hyel yi nə daɓədzər njir nəu nda ku mələm pampam məɗəfa, inda tə hə'i Asiya. Papa'akur ana piyarɗufəu nə hi, hya'atə tsa ndə nda sakana, ndə nda ɗakaɗa ana ndə nda kwa da shili.

⁵Ana hya'atə tsa Yesu Kəristi nda kwa pə sənda njo dləukəri, yar tangərma ku huɗa nji'inda kwa hya'atə ku hwa, ndər mər təlkur təkəra nji təltəl nə dunəya. Nacha ngə ndə nda kwa nyida mən, ga dləuya mən tsa səpəla'a kəmən təwa pənda mashi nyi.

⁶Ngə cha mərtə mən ka njir təlkur ana fərist ka məna mər tlər nə Hyel Ada nyi, səli ana gyalkur ngya tə nənyi ba'anawa! Aɗəmja.

⁷Janə cho shili ku ləmbəkəu, ya kala li kwa la'a nyi, ma'a nji'inda tə dzavənyi, ana njir dunəya kwa sə'ingu nyi. Əngə kwa ɗa! Aɗəmja.

⁸“Naya ngə tangərma ana batəbatənyi, ndə nda ɗakaɗa, ana sakana, ana ndə nda kwa da shili,” ənghwandə Hyel Tlakəu Ndə Ndiya na Gyalkur.

⁹Naya Yohana, zamən hi, ya bazhi daɓəkər kəhi ku ɓwaɓwatəu, təlkur ana mbahuɗə səsə'ua, nda nəkəmən ku Yesu. Nja gədlənda ɗa ya tə Patmos hə'i nda dəl dəgal tə ɓandi, aka mafakə ɓwanya Hyel nda ya bəza, ana ɓwanya jiri nda ya pə təkəra Yesu.

¹⁰A tə Pəchir Tlakəu[1], Shanguɗə tə maɗətə ɗa, kəl ya ngatə kurakə biyahi ɗa 'ual'ual wi papam.

¹¹Kurakə nda tə na, “Tsəfətə dəhə sə'inda ka la'a ku likatəkata ka sətə nyi nə daɓədzər njir nəu nə mələm məɗəfa, nanda ingə, Afisa, Simirna, Birgamus, Tiyatira, Sardisu, Fildalfiya ana Laudikiya.”

¹²Ngə ya sha ka ya la'a nda wa ngə kwa ndər naya, ngə ya la'a chaka'i təkəsə məɗəfa,

¹³aku pama chaka'i təkəsə məɗəfə inda kəl janə vanya ndəu wi Zər Ndəu. Cha handzə ləkutə dzəgamə səya kwa'a tə yir hya cha, ga mbabiya hatla cha na gyarakən nda kwa mbəl wi bəjingha.

¹⁴Kəra cha ana shishi nyi pərtə tyal wi pərpa'ua, lya cha wi kyara hu'u,

¹⁵hya cha wi ndzə nda nja fətəbiya ga kəkəɗənda, kuraka cha wi ɓiti nda kwa hwi.

¹⁶Cha gəziya sasəlga məɗəfa ku chisəma cha, ana katsakər nda na hira cha mətlə kwa səm gagaɗa kwa biya ku nya cha. Huɗəma cha kwa mbəl wi pəchi tankər.

¹⁷Nda ya la'a nyi ngə ya dla ma nyi wi ndə tətah. Kəl ja, ngə cha hatə ɗa chisəma cha, cha na, “Ngwa ka da ləvər wa, naya ngə tangərma naya ngə batəbatənyi.

¹⁸Naya ngə na pi! Ya ɗaka tah, kəl ja, jan ya na pi nda ba'anawa, ya gyalkur tsa ya təkəra tah ana mbwar ngya njikə mambəl.

¹⁹Aka əngə ka tsəfəbiya sənda ka la'a sakana, ana sənda kwa ɗa biyama.

²⁰Janə sənda sasəlga məɗəfə inda ka la'a ku chisəma ya nda, ana chaka'i təkəsə nə bəjingha məɗəfə inda təkəri, sasəlga məɗəfə inda, chama daɓədzər njir nəu nə mələm məɗəfa inga, chaka'i təkəsə nə bəjingha məɗəfə inda tsəu, daɓədzər njir nəu nə mələm məɗəfə inga.”