Read nya huba Takǝr Yohana 13 Bible Online

Takǝr Yohana 13 - nya huba bible

Takǝr Yohana 13

¹Kəl ngə ya la'a vanya sərshishi dəgal kwa biya ku fa'a dəgal nda. Kəra cha məɗəfa ana tələm kuma, ana pahuɗə kər ku kala tələm inda, ba'a tləm həyatəvi tə kala kər inda.

²Sərshishi nda ya la'a nda pabiya tə mapəla'u, kəl ja, hya cha wi nə kəlikəndzau ana nya cha wi nə ləvari. Pwabu məlləm nda tə nənyi gyalkur nyi ana dzəga təlkur nyi ba'a dunama nyi nə sərshishi nda.

³Zhang ku huɗa kəra sərshishi nda mbwar kəti da tə ual'ual gagaɗə wi kwa tsəya nyi, kəl ja, kəti nda wurti. Dəhə dunəya kwa mər məngəl, nda kwa nəu sərshishi nda.

⁴Nji kwa həsəli nə pwabu məlləm nda, aka nənyi tə cha gyalkur nə sərshishi nda, ngə nda hətə nyi səli nə sərshishi nda tsəu nda kwa na, “Wa wi sərshishi na? Wa nji ka pa na cha?”

⁵Nja nənyi gyalkur nə sərshishi nda ka cha bukər nyi ana pə ɓwanya həyatəvi təkəra Hyel, ana gyalkur nə mər dəhə sənda kəra cha kwa i məra, nə hya fwaɗəkumənyi parnya mətləu.

⁶Ngə cha mbəɗiya nya cha ka cha pə ɓwanya həyatəvi nə Hyel, ana cha ngəl tləm nyi na mbwar ngya nyi ana nji'inda na ngya kya huɗamələm.

⁷Nja nənyi gyalkur ka cha pa nji karti nə Hyel ana cha kura nda. Ya ngə nja nənyi gyalkur təkəra dəhə kala jul nji, nji pampaməu, nya pampaməu ba'a kala hə'i.

⁸Dəhə nji'inda na ngya tə dunəya kwa həsəli nə sərshishi nda, nji'inda pa'a nja tsəfəu tləmən nda ku likatəkatə nə pi, nə Zər Gam nda nja tlakər wulya təvi nja mər dunəya.

⁹Ndə nda na himi ngatə cha ngati.

¹⁰Ndə nda nja təttənyi mavakur, cho ma'i kyo mavakur. Ndə nda nja təttənyi ka nja tsa nyi na katsakər, ana katsakər njo tsa nyi. Səngə kwa char ənda nji karti nda səsə'ua na mbahuɗəu, ana nda ngya ku jirikur.

¹¹Ətsəu ngə ya la'a vanya sərshishi, kwa biya ku hə'i ana tələm mətlə wi nə zər gam, kəl ja, ɓwanya nyi wi nə pwabu məlləm.

¹²Cha char dəhə gyalkur nə tangərmar sərshishi nda tə nyanyi, ga mərtə dunəya ana nji'inda na gya kwa nda həsəli nə sərshishi tangərma nda, nda nja mbandə nyi na kəti nda kwa gəla tsa nyi nda.

¹³Cha mərtə səshinshin wawa'a i'i, ma'a cho gwa'atə hu'u kwa səya tə dunəya hya'atə kya huɗamələm nda dəhə nji kwa la'a.

¹⁴Aka sər muniya inda nja nənyi gyalkur mər nyar sərshishi tangərma nda, ngə cha shandənyi kər nə njir dunəya. Cha nar nda nda ɓatliya katəu, aka səlir sərshishi tangərma nda nja takasiya na katsakər, ya dəhə ka ənga cha mbə nda.

¹⁵Nja nənyi gyalkur cha fatəunyi pi nə katə tangərmar sərshishi nda, aka ga cha ɓwanya ana cha gwa'atə nja tsəya dəhə nji'inda tə ngyar həsəli nə katə nda.

¹⁶Ətsəu cha chiu madawa tuku, ngulisha'a ana njirawawa'a, njir gəna ana njir ɗali, dimur ndə ana mava nda dləutsə lamba tə chisəma nda ndara ku nyama nda,

¹⁷məlna a ndə da kwa nau ɗəlbiya ndara ɗəlnda wa kəl ndə nda na lamba nda dzə nyi, nacha ngə tləmər sərshishi nda ndara lamba tləm nyi.

¹⁸Səngə kwa i dəma, macha vanya ndə da nda na ngabiya, cha gwa'abiya lamba sərshishi nga, aka lamba nga nə vanya ndə cha, lambalambanyi nacha ngə 666.