Read nya huba Takǝr Yohana 16 Bible Online

Takǝr Yohana 16 - nya huba bible

Takǝr Yohana 16

¹Əngə ya ngatə kurakə bang tə biya ku mbwa'alə nda kwa na nə chama məɗəfə inda, “Ma'i ma hya shakənyi kətasə məɗəfə nə huɗətlar Hyel ngə təkəra dunəya.”

²Chama tangərma nda tə təra ga shabiya sənda ku kətasə təkəra dunəya, ngə mbələkəɗimi nda kwa tə gagaɗa tə biya dza nji'inda na lamba sərshishi nda, ana nji'inda tə hətə nyi səli nə sənda nja hərtə pabiya nyi nda.

³Ətsəu, ngə mətləkunya chama nda tə shabiya sənda ku kətasə nyi təkəra fa'a dəgaləu, ngə fa'a nda tə sha wi mashi ndə tətah, ngə sə pipi nda ku fa'a nda tə kuɗa.

⁴Ngə makərkunya chama nda tə shabiya sənda ku kətasə nyi təkəra ɓiti i'i ana tsədzəɗəu, nga sha ka mashi.

⁵Əngə ya ngatə chama nda dəgal təkəra dəhə ɓiti kwa na, “Ndə Karti, ndə tsa'atsa'a, tsa'atsa'a tanyi ngə nəuma ngə ka tlanda nga nakə nda ɗəɗəm ana sakana.

⁶Aka nda pənda mashi nji karti ngha ana njir mətakər ngha, ya ngə ka nənda mashi nda sa aka nacha ngə wazəba nda tsa'atsa'a na nda.”

⁷Əngə ya ngatə kurakə tə biya ku dzəgana kwa na, “Əngə tanyi cha, Hyel Tlakə ndər gyalkur, nəuma nghə jiri ya tsa'atsa'a.”

⁸Fwaɗəkunya chama nda tə shanda sə nda ku kətasə nyi təkəra pəchi, ngə cha nənyi gyalkur nə pəchi nda ka cha nginda nji na kwakwaɗəkur nyi.

⁹Ngə kwakwaɗəkura pəchi tə dədatə kala ndəu, ngə nda pə ɓwanya həyatəvi nə tləmər Hyel, ndə nda kwa gəla təmachi ina, ya ngə nda ngyar tubi ga ngyar hətə nyi səli.

¹⁰Tufkunya chama nda tə shakənyi sənda ku kətasə nyi nda təkəra dzəga təlkur sərshishi nda, ngə təlkur nyi tə gwa ku kutla. Nji tsəu kwa ɗə kyara nda ku ɓwaɓwatəu.

¹¹Aka ɓwaɓwatə kənda ba'a mbələkəɗimi inda, nda pə ɓwanya həyatəvi nə Hyel nda kya huɗamələm, ga ngyar tubi tsa səpəla'a kənda inda nda məra.

¹²Ngə kwakunya chama nda tə shanda sənda ku kətasə nyi nda gwatə fa'a dəgal nə Yufəretis, ngə ɓiti nda kwa tə shi'ua, ka ga cha ɓatliya nyi laku nə ka təl inda tə hya'atə təwa zədər pəchi.

¹³Kəl ngə ya la'a məlləm makər[7] wi gwamba, tə biya ku nya pwabu məlləm nda, ana ku nya sərshishi nda ana ku nya njir mətakər gəzhi.

¹⁴Məlləm inga shanguɗə kwadzaɓi inga, nda kwa mər səshinshin, nda kwa kya da təltəl nə dəhə dunəya, ka cha tsəmtə nda ka nda pa Tlakə tə pəchi dəgal nə Hyel Ndər Gyalkur.

¹⁵“Ndzama, janə yo shili wi ngə tə ndər həl! Ndər papa'akur ngə ndə nda kwa ngya na ɓəla ga ɓatliya dzaki nyi, tsa cha da biya ma'i dura'a na kuzhi.”

¹⁶Ngə nda tsəmiya dəhə təl i'i tə mbwa nda njo nga Armagidon[8] ana nya njir Ibrani.

¹⁷Məɗəfəkunya chama nda tə uchitə sənda ku kətasə nyi nda sha huɗamələm, kəl ngə nja ngatə vanyi kurakə bang tə biya ku dzəga təlkur ku mbwa'alə nda kwa na, “A wurti!”

¹⁸Kəl jan nghənghəɗir par, ana dla'ar par, ba'a dəradlər par, ana dzədzər hə'i 'ual'ualəu. A chulkə ndana dzədzər hə'i da taa ɗa tə dunəya wa, dzədzər hə'i cha gagaɗa.

¹⁹Mələm dəgal tə təkə makərəu, ngə dəhə mələm wawa'a nə dunəya tə dla. Hyel da tə far na səɗimi nda Babila nda dəgal tə mər wa, ngə cha gwa'atə nda sa ɗimɗimir huɗətla nyi.

²⁰Kala hə'i nda dəl tə ɓandə ana mə i'i a sati.

²¹Mindindili wawa'a nda tədəɓəkur nyi kwa ɗa kilogram tufkumnyi, tə pəpə səya kya huɗamələm səya təkəra nji. Təmachi mindindili ngə tə gwa'atə nji tə ngəl Hyel, aka chul təmachi nda ɗimiɗimi gagaɗa.