Read nya huba Takǝr Yohana 19 Bible Online

Takǝr Yohana 19 - nya huba bible

Takǝr Yohana 19

¹Ahir nga, ngə ya ngatə kurakə wi nə daɓədzər nji ɗang kya huɗamələm kwa na, “Haleluya! Dləuya ana səli ana gyalkur nə Hyel kəmən nga,

²aka nəuma nyi jiri ya tsa'atsa'a. A tlanda nyi tə cha nəuma nə zawar dəgal nda səwandə dunəya ana kasalikur nyi. A kinda tə cha səkur mələr mashi mavi'i nyi.”

³Ətsəu, nda ɓəla na ana kurakə dzəgam dzəgaməu, “Haleluya! Ear nda kwa biya ku Babila kwa ɗəzə shi ba'anawa.”

⁴Njirawawa'a mətləkumnyi parnya fwaɗə inda ana sə pipi fwaɗə inda tə piya huɗə Hyel ga hətə nyi səli, nacha nda tə ngya ku dzəga təlkur. Nda kwa na, Aɗəmja, Haleluya!

⁵Ngə kurakə tə biya ku dzəga təlkur nda, kwa na, Fala ma Hyel kəmən, nahi mavi'i nyi dəhəu, nahi nda kwa ləvər nyi, ngulisha'a ka njirawawa'a!

⁶Kəl ngə ya ngatə kurakə wi nə daɓədzər nji ɗanghəu, wi kuraka dəl səyasəya ana dəradlər par 'ual'ualəu, kwa na, Haleluya! Aka Hyel Tlakən mən Ndər Gyalkur kwa səm təlkur.

⁷A mən mər hirgyaɗi gagaɗa məna hətə nyi səli! Aka bəjir gha mala Zər Gam shili ti, ya gambəl nyi ɓatliya tə kərnyi.

⁸Nja nənyi dzaki mənakə nda pərtə ka cha pəndzi. Dzaki mənakə nga nacha ngə tlər tsa'atsa'akur nə nji karti.

⁹Kəl ngə chama nda tə nar ɗa, “tsəfəti. ‘Njir papa'akur ngə nji'inda nja nga ka səm ladər gha mala Zər Gam!’ ” Ngə cha tsakətə na, “Nənnə ngə ɓwanya jiri nə Hyel.”

¹⁰Kəl nga ya piya huɗə nyi ka ya hətə nyi səli. Kəl ja, cha nar ɗa, “A'a, ngwa ka həsəli na'a wa! Naya mava Hyel ya, wi ngə kə nga, ana ka zamə nghə ka kwamə nghə nda kwa pə ɓwanya təkəra jirikur kənda ku Yesu. Ka həsəli kəl nə Hyel! Aka sənda takər təkəri nga, nacha ngə ka ga nja pəbiya ɓwanya bwa'abwa'a təkəra Yesu.”

¹¹Ngə ya la'a huɗamələm tə mbəɗa, ya kəl janə taku pərtəu, ndər dlənyi njo nga nyi Jirikur ana Jiri. Cho mər nəuma ana jiri ana dla'a.

¹²Lya cha wi kyara hu'u, ana pahuɗə kər ɗang ku kəra cha. Tləm da tsəfətsəfə nyi dzə nyi nda a ndə do zəndə wa kəl nacha sənyi.

¹³Cha handzə ləkutə dzəgam nda nja chiu ku mashi, ya tləm nyi ɓwanya Hyel.

¹⁴Ləvaləva huɗamələm kwa nəu nyi, kwa dlə taku pərtəu ga pəndzə dzaki pərtə mənakəu, chichinyi.

¹⁵Katsakər tsəltsəl kwa biya ku nyacha, nda cho tsa'unda njir dunəya ni. “Cho səm təlkur na zəwa lyang.” Cho ɓəchibiya ɗimɗimir huɗətlar Hyel Ndər Gyalkur, wi ngətə ɓitir anap kwa biya ku mbwar ɓəchi nyi.

¹⁶Tləm nənnə tsəfətsəfə nyi tə ləkutə nyi gang na eacha, “Təl təkəra təl i'i, ana Tlakə təkəra tlakə i'i.”

¹⁷Kəl ngə ya la'a chama Hyel ta'i tə pəchi, nda tə nga dəhəu eakə inda kwa fəl biya huɗamələm na kurakə dzəgam dzəgaməu, “Anda ma, tsəmtə ma dzə dəhə tə mbwar zhang, aka ladər dəgal nə Hyel.

¹⁸Aka ga hya səm kumur dza təl i'i, ka midala, njir dunama, taku ana njir dlə taku, ana dəhə kumur dza nji, dimur nji ana mavi'i, zər ana ndəradəgaləu.”

¹⁹Kəl ngə ya la'a sərshishi nda ana ka təl ka təl nə dunəya, ana ləvaləva kənda i'i tə tsəmtədzə dəhə tə mbwar zhang, ka nda pa ndər dlə taku nda ana ləvaləva nyi.

²⁰Kəl ja, ngə nja səya sərshishi nda, ana njir mətakər gəzhi inda tə mər səshinshin tə nyanyi. Ana chulkə ngə na səshinshin cha shandənyi kər nji'inda tə dləutsə lamba sərshishi nda, ga hətə nyi səli nə sənda nja hərtə pabiya nyi. Tsa'a kya'a nda nja pəu nda gu hu'u ibir lyang nda pa'a kwa tah.

²¹Kiɗəkər ləvaləva inda həyadzə nja kuɗənda na katsakər nda tə biya ku nya ndə nda kwa dlə taku nda, ya ngə dəhə kwadəga tə ndzuməkər dzə təkəra kumur dza nda.