Read nya huba Takǝr Yohana 2 Bible Online

Takǝr Yohana 2 - nya huba bible

Takǝr Yohana 2

¹“Tsəfətə nyi mafakə na nə chama daɓədzər njir nəu nda vu Afisa: “Nənnə ngə mafakə hya'atə tsa ndə nda tə gəzəya sasəlga məɗəfə ku chisəma cha, kwa ma'i ku pama chaka'i təkəsə məɗəfa nə bəjingha.

²Kwa zəndə ya tlər ngha. Kwa zəndə ya mbadzə ngha ana səsə'u ngha. Kwa zəndə ya ənda a da ko nau səsəutə ngya ka njir mər pəla'akur wa, a dzətə təkə nji'inda kwa nga kərnənda changhabal, ya a da nda ənda wa, ya ka la'a ənda njir tla gəzhi nda.

³Kwa zəndə ya ənda kwa səsə'u ka, ya kwa mbakə huɗu aka tləm ɗa, ya a da ka həɗa nə wa.

⁴Kəl ja ya, a nə sənda yanə təkəra ka, a ngyar təkə nyida nda kə nə tangərma.

⁵Ka ɗənghatə na mbwa nda ka dlati, ka gədi farbikəu. Ma əngə wa, yo shili hənda chaka'i təkəsə nghə tə məngya nyi.

⁶Kəl ja, a mərtə kə mənakəu ana ka ngyar tlər njir nəu Nikolas, wi nda ya ngyari.

⁷Dəhə ndə nda na himi cha ngatə sənda Shanguɗə kwa dəka nə njir nəuwa. Dəhə ndə nda kura, yo nənyi lakur səm yayar wu nə pi, nda ku ngakə Hyel.”

⁸“Ka tsəfətə nyi nə chama njir nəuwa nda vu Simirna ənda: “Janə ɓwanya nyi nacha nda tangərma ana batəbatənyi, nacha nda tah ga ɓəla hya'ati.

⁹Kwa zəndə ya ɓwaɓwatə nda kə kwa. Ya tsəu kwa zəndə ya ɗali ngha, madangə uya da tsa ka. Kwa zəndə ya chulkə ɓwanya ɗimi nda ndo pə nə ngha, nanda ndo na ənda njir Yahuda nda, ya a da nda əngə wa, na nda vi Shantan nda.

¹⁰Ngwa ka da ləvər ɓwaɓwatə nda ko sa wa. Yo nar hi sərtakə kwa pəu alenya nji ku pama hi ku jarum ka cha dzə hi, hyo sa ɓwaɓwatə nə hanyi kuma. Ta'i na jiri mada njo tsəya ngha, ya yo nənghə pahuɗə mba kər nə pi.

¹¹“Dəhə ndə nda na himi cha ngatə sənda Shanguɗə kwa na nə njir nəuwa. Ndə nda kura, ɓwaɓwatər mətləkunya tə do tsəka nyi mada kushi wa.”

¹²“Tsəfətə nyi nə chama njir nəu nda vu Birgamus ənda: “Janə ɓwanya nyi nacha nda na katsakər nda na hira cha mətlə tsəltsəl nyi.

¹³Kwa zəndə ya mbwa nda kə na ngya ti, mbwa nda dzəga təlkur Shantan ti. Ba'aka ənga ka ta'i na jiri nə tləm ɗa. A da ka kəpaliya jirikur nda kə nə wa, mada ku bəjir Antipas ndər ta'i ka ya na jiri, nda nja tsəya ku mələm kəhi tangnda Shantan na ngya ti.

¹⁴“Dəhə ka ənga, bikə da kushi nda ya uya nghə ni, nji da tsa ka nda kwa nəu dlədləɓə nə Bala'am, ndə nda tə dlədləɓətənyi nə Balak cha shandənyi kər nə njir Isra'ila nda səm sənda nja tla nə katəu ana mər kasalikur.

¹⁵Əngə tanyi tsəu, nji da tsa ka, nda kwa nəu dlədləɓə Nikolas.

¹⁶Aka əngə ja tubi! Ma'a da wa yo shili da kə kacha'ana, ka ya panda nda na katsakər nya ya.

¹⁷“Ndə nda na himi cha ngatə sənda Shanguɗə kwa na nə njir nəuwa. Ndə nda kura, yo nənyi manna nda ɗəwaɗəwanyi. Ətsəu yo nənyi hangu pərtəu nda nja tsəfətə taɗər tləm ti, nda a ndə da zəndə wa, kəl ndə nda dləutsi.”

¹⁸“Tsəfətə nyi nə chama nə njir nəu nda hi Tiyatira: “Janə mafakə Zər Hyel, nacha nda lya cha wi hu'u gəɗəgəɗa, ana hya cha wi ndzə nda nja kəkəɗənda.

¹⁹Kwa zəndə ya tlər ngha, nyida ngha, ana jirikur ngha, kwa zəndə ya mavakur ngha ba'a səsə'u ngha, ya kwa mər kə sə'ingə sakana ndiya nda tangərma.

²⁰“Dəhə ka ənga, bikə da nda ya uya nghə ni, ko səhimi mala ngə na tləm nyi Jazabel nga, nda kwa nga kərnyi ndər mətakər. Təwa dlədləɓə nyi cho shakər nə mavi'i ɗa nda kwa mər kasalikur ana səm sənda nja tla katə ni.

²¹A nənyi təya bəji ka cha tubi cha ngyar mər kasalikur, kəl ja, a da cho i wa.

²²Aka əngə ja, yo pinda nyi na shiləka, ana tsəu yo nənyi ɓwaɓwatə 'ual'ualəu nə nji'inda cho mər kasalikur kə'iri, kəl nda ma nda sha tsa chulkə laku kənda.

²³Yo kuɗənda nguli nyi. Əngə tanyi njir nəuwa kwa zəndə ənda naya ngə ndər gwa'abiya ɗufwa nji ana jigadəma kənda, ya yo kinda kala ndə məlməl na tlər nyi.

²⁴Sakan ja, yo na nə hi nahi nda tə həyadzə vu Tiyatira, nahi nda pa'a tə dləukər na dlədləɓə nyi ana lakur Shantan nda njo nga ndzuɗakəkur sə ɗəwaɗəwa, a da yo fəkəhi sə tədəɓə təkəra hi wa.

²⁵Hya gəzəya sənda tsahi kəl ma ya shili.

²⁶“Ndə nda tə kura ga mər sənda yo i tsa'a ku udiya, yo nənyi gyalkur təkəra jul alenya nji.

²⁷‘Cho səm təlkur təkəra nda ana zəwa lyang, cho huɓənda nda wi təm nyingha.’ Tang wi ngə ya dləutsə gyalkur tsa Ada ɗa.

²⁸Əngə tanyi tsəu yo nənyi dəsha wurəvi.

²⁹Ndə nda na himi cha ngatə sənda Shanguɗə kwa na nə njir nəuwa.”