Read nya huba Takǝr Yohana 4 Bible Online

Takǝr Yohana 4 - nya huba bible

Takǝr Yohana 4

¹Ahir nga, ya ɓəla la'a nyavi mɓəɗəmɓəɗənyi kya huɗamələm. Kurakə nda ya ngatə tə ndər naya tangərma wi papam nda tə na, “Zədə tangna yo char nghə sənda təku kwa ɗa hir səna.”

²Təma tanyi kəl Shanguɗə tə maɗətə ɗa, ngə ya la'a dzəga təlkur kya huɗamələm ana vanya ndə tə ngya kwa.

³Ndə nda tə ngya ku dzəga təlkur nda kwa mbəla wi hangu jaspa ana karneliyan. Katsakərpar tsəu nda kwa mbəl wi hangu emaral tə ɓandə dza dzəga təlkur nda.

⁴Alenya dzəga təlkur mətləkumnyi parnya fwaɗəu tsəu tə ɓandə vanya dzəga təlkur nda, ana njirawawa'a tə ngya kwa. Dəhə nda tə pəndzə dzaki pərtə ana pahuɗə kər nə bəjingha ku kəra nda.

⁵Kəl nghənghəɗir vimbəlmbəla, kwa biya ku dzəga təlkur nda, kəl kurakə ana dəradlər par njo ngati. A mar dzəga təlkur nda tsəu, təkəsə məɗəfə da kwa gəɗa. Na nda ngə Shanguɗə məɗəfə nda kwa mər tlər nə Hyel.

⁶A mar dzəga təlkur nda vanya sə da wi dəmal, ɗyaɗyang gagaɗə kwa mbəla. A tə ghada, sə pipi da fwaɗəu tə ɓandə dzəga təlkur nda, dəhə dza nda li, aman nda ana a biyahin nda.

⁷Tangərmar sə pipi nda wi ləvari, mətləkunyi nda wi gyal tla, makərkunyi nda huɗəma cha wi nə ndəu, fwaɗəkunyi nda tsəu wi ngətə dəuku kwa fəla.

⁸Kala zhang ku huɗa sə pipi fwaɗə inda babəka nda kwah kwah, ya li tsəka'a dzəri ma'a tə kiɗa babəka nda. Vu'i na pəchi a da nda bəgə na miya wa, nda kwa na, “Ndə Karti nga, Ndə Karti nga, Ndə Karti nga, Hyel Tlakə Ndər Gyalkur dəhəu! Nacha nda ɗəɗəməu, sakana, ya nacha ngə kwa shili.”

⁹Kala bəji nda sə pipi fwaɗə inda kwa nənyi səli, dəgalkur ana usaku nə nacha nda tə ngya ku dzəga təlkur ana nacha nda na pi ba'anawa,

¹⁰njirawawa'a mətləkumnyi parnya fwaɗə inda kwa piya na səli huɗə ndə nda tə ngya ku dzəga təlkur nda, nacha nda na pi ba'anawa. Ngə nda piya pahuɗə kər təlkur kənda mar dzəga təlkur nda nda kwa na,

¹¹“Hyel Tlakən ea njitə kə ka dləutsə səli ana dəgalkur ana gyalkur, aka nakə tə ɓatlə dəhə səu, ya ana ikur ngha nda ɗa da.”