Read nya huba Takǝr Yohana 5 Bible Online

Takǝr Yohana 5 - nya huba bible

Takǝr Yohana 5

¹Ya la'a likatəkatə pəɗəpəɗa ana tsəfə tə bama cha ana yacha ku chisəma ndə nda tə ngya ku dzəga təlkur nda, ngə nja nyu'unda na dəbə tə mbwa pampam məɗəfa.

²Kəl ngə ya ngatə vanya chama nda dəgaləu, ya ana dunama kwa bəzə na kurakə dzəgam dzəgaməu, “Wa nji ka pasənda sənə nja nyu'unda na, ga cha mbəɗiya likatəkatə pəɗəpəɗə nga?”

³Kəl ja, vanya ndə da kya huɗamələm, ndara tə dunəya, ndara tə kiɗa hə'i nda kwa nau mbəɗiya likatəkatə pəɗəpəɗə nda wa, abiyakata cha kəratsənti.

⁴Kəl ya tiwi ual'ualəu aka a da nja uya ndə nda nji ka mbəɗiya, ndara cha kəratsəntə likatəkatə pəɗəpəɗə nda wa.

⁵Kəl ngə zhang ku huɗa njirawawa'a inda tə nar ɗa, “Ngwa ka da tiwi wa! La'a, Ləvari hya'atə vu Yahuda nyandəla Dauda wurta kwasa. Gyalkur tsa cha ka cha pasənda dəbə pampam məɗəfə nda, cha mbəɗiya likatəkatə pəɗəpəɗə nda.”

⁶Kəl ngə ya la'a Zər Gam tə ta'i ləhə dza dzəga təlkur nda sə pipi fwaɗəu ana njirawawa'a tə ɓandə nda. Zər Gam nda wi nja tlakə nyi wulya, tələma cha məɗəfa, ana lya cha məɗəfa, na nda ngə Shanguɗə Hyel məɗəfə inda nja sə səya tə dunəya dəhəu.

⁷Kəl ngə Zər Gam nda shili hətə likatəkatə pəɗəpəɗə nda tə chisəma ndə nda tə ngya ku dzəga təlkur nda.

⁸Manda cha hətə likatəkatə pəɗəpəɗə nda, kəl ngə sə pipi fwaɗəu inda, ana njirawawa'a mətləkumnyi parnya fwaɗəu inda tə piya buruɓə mar Zər Gam nda. Kala ndə ku huɗa nda taɓtaɓə na zəmbəl ana kyawa bəjingha chaɓə na sənda kwa shi'uni kwitəkwitəu, nacha ngə pətlənya nji karti.

⁹Ngə nda na taɗər miya, “A njitə kə ka dləutsə likatəkatə pəɗəpəɗə nga ka pasənda dəbə inga ka mbəɗiya. Aka nja ɗaka tsəya ngha, ya təwa hatəmachi na mashi ngha ka pəliya nyi nji nə Hyel, ku kala jul nji, ana nya pampaməu ana nji pampaməu ba'a kala hə'i.

¹⁰Ngə ka mərtə nda njir təlkur ana fərist ka nda mər tlər nə Hyel kəmən, ətsəu nda kwa səm təlkur tə dunəya.”

¹¹Nda ya ndzamari, kəl ngə ya ngatə kurakə nə chama Hyel ɗanghəu, nda a ndər nau jigabiya da wa. Nda ɓandə dzəga təlkur nda, ana sə pipi inda ba'a njirawawa'a inda,

¹²nda kwa na miya na kurakə dzəgam dzəgaməu, “Zər Gam nda nja tsəya nda njitə ka dləutsə gyalkur ana gəna ana dəma ana dunama ana dəgalkur ana səli ba'a fala!”

¹³Ngə ya ngatə kala sə pipi kya huɗamələm ana a tə hə'i ana a da kiɗa hə'i ana a tə fa'a ba'a dəhə sə'inda ku nda, kwa na miya, “Fala ana səli ana dəgalkur ana gyalkur ngya tə nə ndə nda tə ngya ku dzəga təlkur, ana nə Zər Gam ba'anawa!”

¹⁴Kəl ngə sə pipi fwaɗəu inda tə na, “Aɗəmja!” Ətsəu, ngə njirawawa'a inda tə piya ga hətə nyi səli.