Read nya huba Takǝr Yohana 7 Bible Online

Takǝr Yohana 7 - nya huba bible

Takǝr Yohana 7

¹Ahir nga ya la'a chama Hyel fwaɗəu ta'ita'i ku ngum fwaɗə nə dunəya, nda gəziya gyang fwaɗə nə dunəya tsa cha da fi təkəra hə'i ndara təkəra dəl ndara təkəra wua.

²Kəl ngə ya la'a vanyi chama Hyel kwa hya'atə təwa zədər pəchi, ana hatimi nə Hyel nda na pi ku cha cha. Ngə cha nga chama fwaɗə inda nja nənda gyalkur takasiya hə'i ana fa'a dəgal na kurakə dzəgam dzəgaməu,

³“Ngwa hya da takasiya hə'i ndara fa'a dəgal ndara wua wa kəl ma məna fətə hatimi anya nyama mavi'i Hyel kəmən.”

⁴Əngə ya ngatə ɗangkura nji'inda nja fətə nda hatimi, 144,000 aku dəhə nyandəla njir Isra'ila.

⁵Aku nyandəla Yahuda 12,000 nja fətə nda, aku nyandəla Roben 12,000, aku nyandəla Gad 12,000.

⁶Aku nyandəla Asha 12,000 aku nyandəla Naftali 12,000, aku nyandəla Manasa 12,000.

⁷Aku nyandəla Simion 12,000 aku nyandəla Levi 12,000, aku nyandəla Isaka 12,000.

⁸Aku nyandəla Zabuluna 12,000, aku nyandəla Yusufu 12,000, aku nyandəla Banyami 12,000.

⁹Ahir nga ngə ya la'a dlama nji ɗang nda a ndər nau jigabiya da wa, ku kala hə'i, jul nji, nji pampaməu ba'a nya pampaməu, tə ta'i mar dzəga təlkur ana a mar Zər Gam, ana dzaki pərtə dzən nda, ana cha danjar dyabino ku cha nda.

¹⁰Ngə nda har kuraka nda dzəgam dzəgaməu nda kwa na, “Dləuya ngya tə nə Hyel kəmən, nda na ngya ku dzəga təlkur, ana a nə Zər Gam.”

¹¹Dəhə chama Hyel inda tə ta'i dzər dzəga təlkur nda, ana a dzər njirawawa'a inda ana sə pipi fwaɗə inda. Nda piya mar dzəga təlkur nda ga hətə nyi səli nə Hyel,

¹²nda kwa na, “Aɗəmja! Fala ana səli, dəma ana usaku ana dəgalkur, gyalkur ana dunama, cha ɗa nə Hyel kəmən ba'anawa. Aɗəmja!”

¹³Ngə zhang ku huɗa njirawawa'a inda tə jau ɗa ga na, “Nji ingə na dzaki pərtə dzən nda ngə ya, na nda wa inga, hya'atə manə nda?”

¹⁴Ngə ya wum ga na, “Kəma, kwa zəndə ka.” Ngə cha na, “Nanda ingə nji'inda tə biya ku ɓwaɓwatə ɗimiɗimi. A chinda tə nda dzaki kənda ku mashi Zər Gam tə ɗa pərtə tyaləu.

¹⁵Aka əngə ja, nacha ngə sənda gwa'atə tə nda mar dzəga təlkur Hyel, nda kwa həsəli nənyi vu'i na pəchi ku Mbwa'alə nyi, ya na cha ngə tə ngya ku dzəga təlkur nga, kwa lakə nda madləɓa nyi.

¹⁶A tsə'u nda kwa ngatə huɓwa ndara hili wa. A tsə'u pəchi da kwa dəda nda ndara nda ngatə kwakwaɗəkura cha wa.

¹⁷Aka Zər Gam ngə tə ghadar dzəga təlkur nga kwa ɗa ka ndər ɓəlakə nda, cho char nda lakur ya dzər ɓitir pi nda kwa hwi. Ya Hyel na kərnyi kwa təɗəbiya nda dəhə sələm ku lya nda.”