Read nya huba Takǝr Yohana 8 Bible Online

Takǝr Yohana 8 - nya huba bible

Takǝr Yohana 8

¹Nda cha pasənda məɗəfəkunya dəbə nda, kəl ngə nja bəgə ɗiyu, a kya huɗamələm nə mar saka zhang.

²Ya ngə ya la'a chama Hyel məɗəfə inda tə ta'i mar Hyel, ngə nja nənda papam məɗəfa.

³Vanya chama Hyel nda na halbə bəjingha nə ɗəzə sənda kwa shi'uni kwitəkwitəu tə shili ga ta'i mar dzəgana, ngə nja nənyi sənda kwa shi'uni kwitəkwitəu ka cha lə ga'a ni, ana pətlənya nji karti nə Hyel, a tə dzəgana bəjingha nda mar dzəga təlkur nda.

⁴Kəl ngə ear sənda kwa shi'uni kwitəkwitə nda tsa'a na pətlənya nji karti nə Hyel tə hya'atə ku cha chama Hyel nda ga təra gya da Hyel.

⁵Ngə chama Hyel tə hətə halbə ɗəzə sənda kwa shi'uni kwitəkwitə nda, ngə cha nyandə na hahir hu'u nda tə dzəgana nda, ngə cha uchi səya tə dunəya, kəl ngə dəradlər par ana kurakə pampaməu ana nghənghəɗi ba'a dzədzər hə'i tə ɗa.

⁶Kəl ngə chama Hyel məɗəfə inda na papam məɗəfə inda tə ɓatliya ka mbəɗə papam inda.

⁷Chama tangərma nda mbəɗiya papam nyi, kəl jan mindindili ana hu'u gwaɗəgwaɗə nyi na mashi, ngə nja pətə səya tə dunəya. Ngə zhang ku makər nə hə'i tə ngia, ana zhang ku makər nə wua tə ngia ba'a sə tsətsə ngitə kəɗətsəu.

⁸Ngə mətləkunya chama nda tə mbəɗiya papam nyi, ya ngə vanya sə wi mə dəgal naɓənaɓə na kyara hu'u nja vakətə gwatə fa'a dəgal nda. Zhang ku makər nə fa'a nda tə sha wi mashi,

⁹zhang ku makər nə sə pipi nə fa'a nda tə kuɗa, ana zhang ku makər nə kala param nda tə fa'a nda tə səuwa.

¹⁰Ngə makərkunya chama nda tə mbəɗiya papam nyi, ngə sasəlga dəgal kwa mbəl wi təkəsəu, tə təɗə səya kya huɗamələm səya tə zhang ku makər nə dəl nda kwa hwi,

¹¹tləmər sasəlga nga ɗəwatəu, zhang ku makər nə ɓiti nda tə ɗa ɗəwatəu, ya nji ɗang tə kuɗə na sa ɓiti ɗəwatə nda.

¹²Fwaɗəkunya chama nda tə mbəɗiya papam nyi, ngə nja dəgə zhang ku makər nə pəchi, zhang ku makər nə hya ana zhang ku makər nə sasəlga, aka ga zhang ku makər kənda ɗa na kutla. Zhang ku makər nə ɓupəchi tə ɗa na kutla, ya əngə tanyi vu'i tsəu tə ɗa tuɗumu.

¹³Nda yo ndzama, ngə ya ngatə dəuku nda kwa fəl biya huɗamələm kwa na na kurakə dzəgam dzəgaməu, “Kirpəu! Kirpəu! Kirpəu na njir dunəya, aka sənda kwa ɗa, ma chama ingə tə mbəɗiya papam makər ingə tə həyadzə nga!”