Read nya huba Takǝr Yohana 9 Bible Online

Takǝr Yohana 9 - nya huba bible

Takǝr Yohana 9

¹Tufkunya chama nda mbəɗiya papam nyi, ngə ya la'a sasəlga nda təɗə kya huɗamələm səya hu'i nda, ngə nja nənyi sər mbəɗə nya ka'u nda a ɓəlinyi da wa nda.[3]

²Nda cha mbəɗiya ka'u nda, ngə ear tə biya kwa wi ear batə səu, nga haɗiya pəchi ana huɗamələm dərdla'a.

³Ngə ndzəkwa tə zəbiya tə dunəya ku ear nda, ngə nja nə nda gyalkur dah wi nə idah gwangula.

⁴Nja nar nda ngwa nda da takasiya sar nda təkəra hə'i, ndara wua ana kala sə tsətsə wa, kəl nda nji'inda pa'a na hatimi nə Hyel ku nyama nda.

⁵Ada nja nənda gyalkur kuɗənda nji wa, kəl nda nda nənda ɓwaɓwatəu nə hya tufu. Ɓwaɓwatə nda nda kwa sa, wi ngə tə idah gwangula kwa izza.

⁶Aku bəji nga nji kwa gwa'a tah, ya a da nda kwa uya wa, nda kwa chim tah, kəl ja, tah kwa hwi tsa nda.

⁷Ndzəkwa inda tə pabiya taku nda nja ɓatliya ka ki dla'a. Aku kəra nda vanya sə da wi pahuɗə mba kər bəjingha, huɗəma nda tsəu wi nə ndəu.

⁸Shishi kənda wi nə mahi'i, ana hira nda tsəu wi nə ləvari.

⁹Nja mbuya hatla nda na ləkutəu pa, ana kurakər babəka nda wi hya charkaina taku inda kwa ki dla'a.

¹⁰Shi'ua nda na gəda kwa wi nə idah, ya ku shi'ua nda tsəu gyalkur da nə nənyi ɓwaɓwatə nə nji hya tufu.

¹¹Chama nda nja fəkər təkəra ka'u nda a ɓəlinyi da wa nda ngə wi təl kənda ana tləm nyi ku nya njir Yahuda, “Abaddon,” aku nya njir Heleni tsəu, “Apoliyon.”[4]

¹²Tangərmar ɓwaɓwatə tərabiyati, ya tsə'u tanyi mətləkunyi kwa shili.

¹³Kwakunya chama nda tə mbəɗiya papam nyi, ngə ya ngatə kurakəu kwa biya ku ngum fwaɗə nə dzəgana bəjingha nda mar Hyel,

¹⁴kwa na nə kwakunya chama nda na papam nda, “Pəliya chama fwaɗə inda nja mbiya nya dəl dəgal nə Yufəretis nda!”

¹⁵Ngə nja pəliya chama fwaɗə inda nja fiya ka nəna bəji ana pəchi na ana hya na ana fa na aka nda kuɗənda zhang ku makər nə ɗangkura nji.

¹⁶Ɗangkura ləvaləva dla'a na taku kwa ɗa miliyan gharəu mətləu, əngə sənda nja nar ɗa.

¹⁷Aku shi'uni pəchi ɗa ya la'a taku ana njir dlənda, ləkutə pa kənda dəzə njong wi hu'u gəgəɗa, wi ɓitir chacha ba'a ibizər ibizər. Kəra taku inda wi nə ləvari, hu'u tsəu ana ear kwa biya ku nya nda ba'a vanya sə kwa ngi wi hu'u kwa shi'uni ɗimi.

¹⁸Nja kuɗənda zhang ku makər nə nji ana ɓwaɓwatə pampam makər inda kwa biya ku nya nda inda.

¹⁹Gyalkur taku inda aku nya nda ana shi'ua nda, aka shi'ua nda wi pwabu, kər da tə shi'u inda ka ga nda nənyi ɓwaɓwatə nə nji ni.

²⁰Həyadzər nji'inda pa'a tə kuɗə na ɓwaɓwatə nda, a da nda tubi tsa sə'inda nda mər na cha nda ba'aka sakangə wa, wi ka həsəli nə kwadzaɓi, katə nda nja mər na bəjingha ana azurfa ana ndzəa, ana hangu ana katə nda nja fiɗə na wua, inda pa'a kwa la'a sə ndara ngatə ndara ma'i wa.

²¹Ya a nanda tubi tsa kuɗə nji, ana tsakəza, ana kasalikur ndara həl wa.