Read nynorsk 1938 Fyrste Mosebok 11 Bible Online

Fyrste Mosebok 11 - nynorsk 1938 bible

Fyrste Mosebok 11

¹Og heile verdi hadde eitt tungemål og same ordi.

²Og då dei for austigjenom, fann dei ei slette i Sinearlandet, og der slo dei seg ned.

³Og dei sa seg imillom: Kom, lat oss gjera tigl og brenna det vel! Og so bruka dei tiglet til murstein, og i staden for kalk bruka dei jordbek.

⁴So sa dei: Kom, lat oss byggja oss ein by med eit tårn som når upp i himmelen, og gjera oss namngjetne, so me ikkje vert spreidde ut yver all jordi!

⁵Då steig Herren ned og vilde sjå byen og tårnet som manneborni bygde.

⁶Og Herren sa: Sjå, dei er eitt folk, og alle hev dei eit tungemål; dette er det fyrste dei tek seg fyre, og no vert ikkje noko umogeleg for dei, kva dei so finn på å gjera.

⁷Lat oss stiga ned der og vildra tungemålet deira, so den eine ikkje skynar kva den andre segjer.

⁸So spreidde Herren dei derifrå ut yver heile jordi, og dei heldt upp med å byggja på byen.

⁹Difor kalla dei han Babel; for der vildra Herren tungemålet for heile verdi, og derifrå spreidde Herren dei ut yver all jordi.

¹⁰Dette er soga um Sems-ætti: Då Sem var hundrad år gamal, fekk han sonen Arpaksad, tvo år etter storflodi.

¹¹Og etter at Sem hadde fenge Arpaksad, levde han endå i fem hundrad år og fekk søner og døtter.

¹²Då Arpaksad var fem og tretti år gamal, fekk han sonen Salah.

¹³Og etter at Arpaksad hadde fenge Salah, levde han endå fire hundrad og tri år og fekk søner og døtter.

¹⁴Då Salah var tretti år gamal, fekk han sonen Eber.

¹⁵Og etter Salah hadde fenge Eber, levde han endå fire hundrad og tri år og fekk søner og døtter.

¹⁶Då Eber var fire og tretti år gamal, fekk han sonen Peleg.

¹⁷Og etter Eber hadde fenge Peleg, levde han endå fire hundrad og tretti år og fekk søner og døtter.

¹⁸Då Peleg var tretti år gamal, fekk han sonen Re'u.

¹⁹Og etter Peleg hadde fenge Re'u, levde han endå tvo hundrad og ni år og fekk søner og døtter.

²⁰Då Re'u var tvo og tretti år gamal, fekk han sonen Serug.

²¹Og etter at Re'u hadde fenge Serug, levde han endå tvo hundrad og sju år og fekk søner og døtter.

²²Då Serug var tretti år gamal, fekk han sonen Nakor.

²³Og etter Serug hadde fenge Nakor, levde han endå tvo hundrad år og fekk søner og døtter.

²⁴Då Nakor var ni og tjuge år gamal, fekk han sonen Tarah.

²⁵Og etter Nakor hadde fenge Tarah, levde han endå hundrad og nittan år og fekk søner og døtter.

²⁶Då Tarah hadde fyllt sytti år, fekk han sønene Abram og Nakor og Haran.

²⁷Dette er soga um Tarah og ætti hans; Tarah fekk sønene Abram og Nakor og Haran. Og Haran fekk sonen Lot.

²⁸Og Haran døydde hjå Tarah, far sin, i fødesheimen sin, i Ur i Kaldea.

²⁹Og Abram og Nakor tok seg konor. Kona hans Abram heitte Sarai, og kona hans Nakor heitte Milka og var dotter åt Haran, far åt Milka og Jiska.

³⁰Men Sarai var barnlaus; ho hadde aldri ått barn.

³¹Og Tarah tok med seg Abram, son sin, og Lot Haransson, soneson sin, og Sarai, sonekona si, kona hans Abram, og dei tok ut saman frå Ur i Kaldea og vilde fara til Kana'ansland. Og dei kom til Karan, og vart buande der.

³²Og dagane hans Tarah vart tvo hundrad og fem år. So døydde Tarah i Karan.