Read nynorsk 1938 Fyrste Mosebok 12 Bible Online

Fyrste Mosebok 12 - nynorsk 1938 bible

Fyrste Mosebok 12

¹Då sa Herren til Abram: Far no du ut or landet ditt, burt ifrå folket og farshuset ditt, og til det landet som eg vil syna deg!

²Og eg vil gjera deg til eit stort folk og velsigna deg og gjera namnet ditt stort. Du skal verta ei velsigning!

³Og eg vil velsigna dei som velsignar deg, og den som forbannar deg, vil eg forbanna. Og i deg skal alle ætter på jordi velsignast.

⁴So tok Abram ut, som Herren hadde sagt han fyre, og Lot var med han. Og Abram var fem og sytti år gamal då han flutte frå Karan.

⁵Og Abram tok med seg Sarai, kona si, og Lot, brorson sin, og alt godset dei hadde vunne, og det folket dei hadde fenge i Karan, og dei tok ut og vilde fara til Kana'ansland, og dei kom til Kana'ansland.

⁶Og Abram for framigjenom landet alt til Sikemsbygdi, til terebintelunden åt More. Og kana'anitane budde då der i landet.

⁷Då synte Herren seg for Abram og sa: Dette landet vil eg gjeva ætti di! Og Abram bygde der eit altar for Herren, som hadde synt seg for han.

⁸Derifrå flutte han til fjelli austanfor Betel og sette upp tjeldbui si so han hadde Betel i vest og Ai i aust. Og der bygde han Herren eit altar og kalla på Herren.

⁹Sidan muna Abram seg etter kvart framigjenom til sudlandet. /[6]

¹⁰So vart det uår i landet. Då for Abram ned til Egyptarland og vilde halda til der; for naudi var stor i landet.

¹¹Då det leid so langt at han mest var komen til Egyptarland, sa han til Sarai, kona si: Høyr no her! Eg veit at du er ei fager kvinna.

¹²Og det kjem til å ganga so at når egyptarane fær sjå deg, so segjer dei: Dette er kona hans! Og so slær dei meg i hel, men deg let dei leva.

¹³Kjære deg, seg du er syster mi, so det kann ganga meg vel for di skuld, og eg ikkje skal missa livet!

¹⁴Då so Abram kom fram til Egyptarland, såg egyptarane kvinna og tykte ho var ovfager.

¹⁵Og hovdingane åt Farao såg henne og rosa henne for Farao. So vart kvinna henta til huset åt Farao.

¹⁶Og Abram gjorde han vel imot for hennar skuld, og han fekk både sauer og naut og asen og drenger og gjentor og asenfyljor og kamelar.

¹⁷Men Herren søkte Farao og huset hans med svære plagor for Sarai skuld, kona hans Abram.

¹⁸Då kalla Farao Abram til seg og sa: Kva er det du hev gjort imot meg! Kvi let du meg ikkje vita at ho var kona di?

¹⁹Kvi sa du at ho er syster di, so eg tok henne til kona? Sjå der hev du kona di! Taka henne og far din veg!

²⁰Og Farao sette nokre menner til å fylgja han på vegen med kona hans og alt det han åtte.