Read nynorsk 1938 Fyrste Mosebok 14 Bible Online

Fyrste Mosebok 14 - nynorsk 1938 bible

Fyrste Mosebok 14

¹I den tidi då Amrafel var konge i Sinear, og Arjok konge i Ellasar, og Kedorlaomer konge i Elam og Tideal konge yver Gojim,

²då hende det at det vart ufred millom dei kongane og Bera, kongen i Sodoma, og Birsa, kongen i Gomorra, og Sineab, kongen i Adma, og Semeber, kongen i Sebo'im, og kongen i Bela, som no heiter Soar.

³Alle desse slo seg i hop og la vegen til Siddimdalen, der Saltsjøen er no.

⁴Tolv år hadde dei tent Kedorlaomer, men det trettande året fall dei frå han.

⁵Og det fjortande året kom Kedorlaomer og dei kongane som var med han, og slo under seg refa'itane i Asterot-Karna'im og susitane i Ham og emitane i Sjave-Kirjata'im

⁶og horitane på fjelli deira, Se'irfjelli, alt til El-Paran, som ligg utmed øydemarki.

⁷So snudde dei og kom til En-Mispat, der som Kades ligg, og la under seg alt Amalekitarlandet og amoritane med, dei som budde i Haseson-Tamar.

⁸Og kongen i Sodoma og kongen i Gomorra og kongen i Adma og kongen i Sebo'im og kongen i Bela, som no heiter Soar, dei tok ut og fylkte heren sin imot dei i Siddimdalen,

⁹mot Kedorlaomer, kongen i Elam, og Tideal, kongen yver Gojim, og Amrafel, kongen i Sinear, og Arjok, kongen i Ellasar, fire kongar mot fem.

¹⁰Men i Siddimdalen var det fullt av jordbekgrover. Og kongane i Sodoma og Gomorra laut røma, og då stupte dei ned i grovene, og dei som att var, rømde til fjells.

¹¹Og hine tok alt godset i Sodoma og Gomorra og all maten deira og drog burt.

¹²Og dei tok med seg Lot, brorson hans Abram, og godset og drog av med; for han budde i Sodoma.

¹³Men ein av dei som hadde kome seg undan, bar bod um alt dette til Abram, hebrearen, som budde attmed terebintelunden åt Mamre, amoriten. Og Mamre, han var bror åt Eskol og Aner, og dei var alle i samlag med Abram.

¹⁴Då no Abram høyrde at brorson hans var fanga, tok han ut med alle sine fullrøynde sveinar, som var fødde og fostra i huset hans, tri hundrad og attan i talet, og sette etter dei alt til Dan.

¹⁵Der bytte han sund flokken sin og tok på dei um natti med sveinane sine, og han vann yver dei og elte dei ratt til Hoba, som ligg nordanfor Damaskus.

¹⁶So tok han att alt godset, og Lot, brorson sin, og hans gods tok han og att, kvinnone og heile folket med.

¹⁷Då han so var på heimvegen og hadde vunne yver Kedorlaomer og dei kongane som var med han, kom kongen i Sodoma imot han til Sjavedalen, der som no heiter Kongsdalen.

¹⁸Og Melkisedek, kongen i Salem, kom ut med brød og vin. Han var prest åt Gud den høgste.

¹⁹Og han velsigna han og sa: Gud den høgste, han som eig himmel og jord, signe Abram!

²⁰Og lova vere Gud den høgste, som hev gjeve fiendane dine i di hand! Og Abram gav honom tiend av alt.

²¹Og kongen i Sodoma sa til Abram: Gjev meg folket, og taka du godset!

²²Då sa Abram til kongen i Sodoma: Eg retter upp handi til Herren, Gud den høgste, han som eig himmel og jord:

²³Ikkje so mykje som ein tråd eller ei skoreim tek eg imot av det som ditt er. Du skal ikkje hava det å segja: Eg gjorde Abram rik.

²⁴Eg vil ingen ting hava, anna enn den maten som sveinane hev ete, og den luten som fell på dei mennene som var med meg, Aner og Eskol og Mamre; lat de få sin lut!