Read nynorsk 1938 Fyrste Mosebok 15 Bible Online

Fyrste Mosebok 15 - nynorsk 1938 bible

Fyrste Mosebok 15

¹Ei tid etter dette hadde hendt, kom Herrens ord til Abram i eit syn, og det lydde so: Ver ikkje ottefull, Abram! Eg er din skjold! Løni di skal vera ovleg stor.

²Då sa Abram: Herre, Herre, kva vil du gjeva meg? Barnlaus fer eg min veg, og den som vert eigande huset mitt, er Elieser frå Damaskus.

³Sjå meg hev du ikkje gjeve barn, sa Abram, og ein tenar som er fødd i huset mitt kjem til å erva meg.

⁴Men sjå då kom Herrens ord til han, og det lydde so: Nei, han skal ikkje erva deg, men ein som er komen av ditt eige blod, skal erva deg.

⁵Og han leidde han utanfor og sa: Sjå upp til himmelen og tel stjernone, um du er god til. So tallaus, sa han til han, skal ætti di verta.

⁶Og Abram trudde Herren, og det rekna han honom til rettferd.

⁷Og han sa til han: Eg er Herren, som leidde deg ut frå Ur i Kaldea, og eg vil gjeva deg dette landet til eiga.

⁸Og Abram sa: Herre, Herre, kva vissa skal eg hava på det at eg skal få det til eiga?

⁹Då sa Herren til han: Henta meg ei triæringskviga og ei triæringsgeit og ein triæringsver og ei turtelduva og ein duveunge!

¹⁰So henta Abram alt dette åt han og skar dyri midt i tvo og la den eine luten av kvart dyr beint imot det andre. Men fuglane skar han ikkje sund.

¹¹Og rovfuglar kom dalande ned på kjøtet, men Abram jaga dei burt.

¹²Då det so leid til at soli vilde glada, kom det ein tung svevn på Abram, og gruv, stort myrker, kom yver han.

¹³Og han sa til Abram: Det skal du vita, at ætti di skal halda til i eit land som ikkje er deira, og dei skal træla for folket der og tola mykje vondt av det i fire hundrad år.

¹⁴Men det folket som dei lyt træla for, vil eg og døma; og sidan skal dei draga ut med mykje gods.

¹⁵Og du skal fara i fred til federne dine og ganga i gravi i ein god alderdom.

¹⁶Og i den fjorde mannsalderen skal dei koma hit att; for endå vantar det noko på syndeskuldi åt amoritane fyrr målet er fullt.

¹⁷No var soli gladd, og det var stumende myrkt. Då fekk han sjå ein rjukande omn og ein eldsloge som for fram millom kjøtstykki.

¹⁸Den dagen gjorde Herren ei pakt med Abram og sa: Di ætt gjev eg dette landet, frå Egyptarlandselvi alt til den store elvi, til Fratelvi,

¹⁹landet åt kenitane og kenisitane og kadmonitane

²⁰og hetitane og ferisitane og refa'itane

²¹og amoritane og kana'anitane og girgasitane og jebusitane.