Read nynorsk 1938 Fyrste Mosebok 23 Bible Online

Fyrste Mosebok 23 - nynorsk 1938 bible

Fyrste Mosebok 23

¹Alderen hennar Sara vart hundrad og sju og tjuge år gamal; det var leveåri hennar Sara.

²Og Sara døydde i Kirjat-Arba, som no heiter Hebron, i Kana'ans land. Og Abraham gjekk heim og øya og gret yver Sara.

³Sidan reis Abraham upp og gjekk burt ifrå liket og han tala til Hets-borni og sa:

⁴Ein framand er eg imillom dykk, ein utlending. Lat meg få ein gravstad til eige hjå dykk, so eg kann få gøyma henne som eg hev mist.

⁵Då svara Hets-borni Abraham og sa til han:

⁶Høyr her, gode herre! Ein Guds hovding er du millom oss. I den beste av gravene våre kann du jordi henne som du hev mist. Ingen av oss skal meinka deg gravi si til å jorda henne i.

⁷Då reiste Abraham seg og bøygde seg for landslyden, for Hets-borni,

⁸og so tala han med dei og sa: Samtykkjer de i at eg gøymer henne som eg hev mist, so gjer vel og tel for Efron, son åt Sohar,

⁹at han let meg få Makpelahelleren, som han eig, og som ligg i utkanten av gjordet hans. Han skal få gode pengar for han, er so han vil selja meg han, her midt imillom dykk, til eigande gravstad.

¹⁰Men Efron sat midt millom Hets-borni, og Efron, hetiten, svara Abraham so dei høyrde på det, Hets-borni, alle dei som sokna til tingstaden hans, og sa:

¹¹Nei, høyr her, gode herre! Dette gjordet gjev eg deg, og helleren som er der, den gjev eg deg og, for augo åt landsmennene mine gjev eg deg han. Jorda du henne som du hev mist!

¹²Då bøygde Abraham seg for landslyden,

¹³og han tala til Efron so landslyden høyrde på det, og sa: Gjev du vilde høyra på meg! Eg legg det som gjordet er verdt. Tak imot det av meg, so eg der kann få jorda henne som eg hev mist!

¹⁴Og Efron svara Abraham og sa til han:

¹⁵Høyr her, herre! Eit jordstykke som er verdt fire hundrad sylvsekel, kva er det millom meg og deg? Jorda du henne som du hev mist!

¹⁶Og Abraham skyna kva Efron meinte, og Abraham vog upp åt Efron det sylvet han hadde tala um medan Hets-borni høyrde på det, fire hundrad sylvsekel, av dei som gjekk og galdt millom kjøpmennene.

¹⁷Og gjordet hans Efron i Makpela, som ligg austanfor Mamre, både gjordet og helleren som der er, og alle dei tre som på gjordet voks, so vidt det rokk rundt i kring, vart skøytt

¹⁸til Abraham so dei såg på det, Hets-borni, alle dei som sokna til tingstaden hans.

¹⁹Sidan jorda Abraham Sara, kona si, i helleren på Makpelagjordet, austanfor Mamre, der Hebron no ligg, i Kana'ansland.

²⁰Og gjordet med helleren som var der, kom frå Hets-borni yver på Abrahams hender, so han fekk det til eigande gravstad.