Read nynorsk 1938 Fyrste Mosebok 4 Bible Online

Fyrste Mosebok 4 - nynorsk 1938 bible

Fyrste Mosebok 4

¹Og Adam budde saman med Eva, kona si, og ho vart med barn og åtte Kain. Då sa ho: Ein mann hev eg fenge av Herren!

²Sidan åtte ho Abel, bror hans. Og Abel vart sauehyrding, og Kain vart jorddyrkar.

³Og det hende då det leid av ei tid, at Kain bar fram åt Herren ei gåva av grøda på marki.

⁴Og Abel bar og fram ei gåva, og han gav av frumselambi or fenaden sin og feittet deira. Og Herren såg blidt til Abel og gåva hans,

⁵men ansa ikkje Kain og hans gåva. Då vart Kain brennande harm, og stirde nedfyre seg.

⁶Og Herren sa til Kain: Kvi er du harm, og kvi stend du og stirer nedfyre deg?

⁷Hev du godt i tankar, kann du ikkje då lyfta upp augo. Men hev du ikkje godt i tankar, so ligg syndi framfyre døri og lurer. Ho trår etter deg, men du lyt halda henne i age.

⁸Og Kain tala med Abel, bror sin. Og det gjekk so til medan dei var utpå marki, at Kain rauk på Abel, bror sin, og slo han i hel.

⁹Då sa Herren til Kain: Kvar er Abel, bror din? Og han svara: Eg veit ikkje. Skal eg gjæta bror min?

¹⁰Då sa han: Kva hev du gjort! Høyr, blodet åt bror din ropar til meg frå jordi!

¹¹Og no skal du vera bannlyst frå den jordi som let upp munnen og tok imot blodet åt bror din av di hand.

¹²Når du dyrkar marki, skal ho ikkje meir gjeva deg sin avle. Heimlaus og fredlaus skal du vera på jordi.

¹³Då sa Kain til Herren: Skuldi mi er større enn at eg kann bera.

¹⁴Sjå, du hev i dag drive meg ut or landet, og eg lyt løyna meg for dine augo og vera heimlaus og fredlaus på jordi, og kven som finn meg, kjem til å slå meg i hel.

¹⁵Då sa Herren til han: Nei! for drep nokon Kain, so skal det hemnast sju gonger. Og Herren gav Kain eit merke, so dei ikkje skulde slå han i hel, kven som fann han.

¹⁶So hadde Kain seg utor Herrens augo, og busette seg i eit land som heiter Nod, austanfor Eden. /[2]

¹⁷Og Kain budde saman med kona si, og ho vart med barn og åtte Hanok. Sidan tok han seg til å byggja ein by og kalla byen Hanok etter son sin.

¹⁸Og Hanok vart far til Irad; og Irad fekk sonen Mehujael, og Mehujael fekk sonen Metusael, og Metusael fekk sonen Lamek.

¹⁹Og Lamek tok seg tvo konor. Den eine heitte Ada, den andre heitte Silla.

²⁰Og Ada åtte sonen Jabal. Frå han er dei ætta dei som bur i tjeldbuer og held buskap.

²¹Og bror hans heitte Jubal. Frå han er dei ætta all dei som spelar på harpa og fløyta.

²²Og Silla åtte og ein son. Han vart kalla Tubalkain; og han smidde alle slag bitjarn, både av kopar og av jarn. Og syster åt Tubalkain heitte Na'ama.

²³Og Lamek sa til konone sine: Ada og Silla, høyr mine ord, Lameks konor, lyd på mi røyst! Ein mann drep eg for kvart sår og ein svein for kvar skråma eg fær.

²⁴For Kain skal hemnast sju gonger, men Lamek sju og sytti gonger.

²⁵Og Adam budde med kona si som han fyrr hadde gjort, og ho åtte ein son og kalla han Set. For Gud hev sett meg ein annan son i staden hans Abel, sa ho, for di Kain slo han i hel. /[3]

²⁶Og Set fekk og ein son og kalla han Enos. Då tok dei til å kalla på Herren.