Read nynorsk 1938 Fyrste Mosebok 40 Bible Online

Fyrste Mosebok 40 - nynorsk 1938 bible

Fyrste Mosebok 40

¹Ei tid etter dette hadde gjenge fyre seg, hende det at skjenkjaren og bakaren åt kongen i Egyptarland forsåg seg mot herren sin, kongen i Egyptarland.

²Og Farao vart harm på båe hirdmennene sine, skjenkjarmeisteren og bakarmeisteren,

³og sette dei faste hjå hovdingen yver livvakti, i tårnet der Josef sat fanga.

⁴Og hovdingen yver livvakti sette Josef til å sjå til dei, og han gjekk dei til handa. Og dei vart sitjande ei tid i fangehuset.

⁵Ein gong hadde dei kvar sin draum, dei tvo, skjenkjaren og bakaren åt kongen i Egyptarland, dei som sat fanga i tårnet; i ei og same natti hadde dei kvar sin draum, og draumane deira hadde kvar si meining.

⁶Og Josef kom inn til dei um morgonen, såg han det på dei at dei var i ulag.

⁷Då tala han til hirdmennene åt Farao, dei som sat fengsla med han hjå husbonden hans, og spurde: Kvi er de so sturne av dykk i dag?

⁸Dei svara: Me hev drøymt, og det er ingen som kann tyda draumane våre. Då sa Josef til dei: Er det ikkje Gud som råder for uttydingi? Seg de meg kva de hev drøymt!

⁹So fortalde skjenkjarmeisteren Josef draumen sin og sa til han: Eg tykte so skilleg det stod eit vintre framfyre meg,

¹⁰og på det vintreet var det tri greiner. Og det syntest skjota knuppar, blomane spratt, krasane mogna til druvor.

¹¹Og staupet åt Farao held eg i handi, eg druvone tok eg og kreista utor dei upp i staupet åt Farao, og so rette eg staupet til Farao.

¹²Og Josef sa til han: Dette er so å tyda: Dei tri greinene, det er tri dagar.

¹³Når det lid um tri dagar, skal Farao retta upp hovudet ditt og setja deg inn att i romet ditt, og du skal retta staupet til Farao, som du fyrr var van med å gjera, den tid du var skjenkjaren hans.

¹⁴Men koma no i hug meg, når du hev fenge det godt! Kjære vene, gjer vel og tal um meg til Farao, so eg kann koma ut or dette huset!

¹⁵For eg er stolen frå Hebrearlandet, og her hev eg ikkje gjort noko som dei skulde setja meg i fangeholet for.

¹⁶Då bakarmeisteren såg at han hadde gjeve so god ei uttyding, sa han til Josef: Eg tykte so skilleg eg bar tri korger med kveitebrød uppå hovudet.

¹⁷Og i den øvste korgi var allslags kakor, som var baka åt Farao, og fuglane åt dei upp utor korgi på hovudet mitt.

¹⁸Og Josef tok til ords og sa: Dette er so å tyda: Dei tri korgene, det er tri dagar.

¹⁹Når det lid um tri dagar, skal Farao retta upp hovudet ditt og hogge det av deg; so skal han hengja deg i eit tre, og fuglane skal eta kjøtet av deg.

²⁰So hende det den tridje dagen - det var årmålsdagen åt Farao - då gjorde han eit gjestebod for alle mennene sine; og han rette upp hovudet åt skjenkjarmeisteren og bakarmeisteren midt imellom mennene sine.

²¹Han sette skjenkjarmeisteren inn att i embetet hans, so han fekk retta staupet til Farao,

²²og bakarmeisteren hengde han, so som Josef hadde spått dei.

²³Men skjenkjarmeisteren kom ikkje i hug Josef; han gløymde han.