Read nynorsk 1938 Fyrste Mosebok 46 Bible Online

Fyrste Mosebok 46 - nynorsk 1938 bible

Fyrste Mosebok 46

¹Og Israel tok ut med alt det han hadde, og då han kom til Be'erseba, ofra han slaktoffer til han som var Gud åt Isak, far hans.

²Då tala Gud til Israel i ei syn um natti og sa: Jakob, Jakob! Og han svara: Ja, her er eg.

³Då sa han: Eg er Gud, Gud åt far din. Ver ikkje redd for å fara ned til Egyptarland; for der vil eg gjera deg til eit stort folk!

⁴Eg skal sjølv fara med deg ned til Egyptarland, og eg skal fylgja deg upp att og; det kann du lita på! Og Josef skal leggja att augo dine.

⁵So tok Jakob ut frå Be'erseba, og Israels-sønene køyrde Jakob, far sin, og borni og konone sine i dei vognene som Farao hadde sendt til å henta han i.

⁶Og dei tok med seg bufeet sitt og godset sitt som dei hadde lagt seg til i Kana'ansland. So kom dei til Egyptarland, Jakob og all hans ætt med han;

⁷sønene og sonesønene, døtterne og sonedøtterne, heile si ætt, hadde han med seg til Egyptarland.

⁸Og dette er namni på Israels-borni som kom til Egyptarland, Jakob og sønene hans: Ruben, eldste son åt Jakob,

⁹og sønene åt Ruben: Hanok og Pallu og Hesron og Karmi;

¹⁰sønene åt Simeon: Jemuel og Jamin og Ohad og Jakin og Sohar, og Saul, som han hadde fenge med ei kana'anitarkvinna;

¹¹og sønene åt Levi: Gerson og Kehat og Merari;

¹²og sønene åt Juda: Er og Onan og Sela og Peres og Serah - men Er og Onan døydde i Kana'ansland - og sønene åt Peres: Hesron og Hamul;

¹³og sønene åt Issakar: Tola og Puva og Job og Simron;

¹⁴og sønene åt Sebulon: Sered og Elon og Jahle'el.

¹⁵Dette var sønene åt Lea, dei som ho fekk med Jakob i Mesopotamia, og so fekk Dina, dotter hans, i alt tri og tretti sjeler, søner og døtter.

¹⁶Og sønene åt Gad: Sifjon og Haggi, Suni og Esbon, Eri og Arodi og Areli;

¹⁷Og sønene åt Aser: Jimna og Jisva og Jisvi og Bria, og so Serah, syster deira; og sønene åt Bria var Heber og Malkiel.

¹⁸Dette var borni åt Silpa, som Laban gav Lea, dotter si; ho fekk dei med Jakob, det var sekstan sjeler.

¹⁹Og sønene åt Rakel, kona hans Jakob, var Josef og Benjamin.

²⁰Og Josef fekk born i Egyptarland; han fekk dei med Asnat, dotter åt Potifera, presten i On; dei heitte Manasse og Efra'im.

²¹Og sønene åt Benjamin: Bela og Beker og Asbel, Gera og Na'aman, Ehi og Ros, Muppim og Huppim og Ard.

²²Dette var dei borni som Jakob fekk med Rakel, i alt fjortan sjeler.

²³Og son åt Dan: Husim;

²⁴og sønene åt Naftali: Jahse'el og Guni og Jeser og Sillem.

²⁵Dette var sønene åt Bilha, som Laban gav Rakel, dotter si; ho fekk dei med Jakob, i alt sju sjeler.

²⁶Alle dei som kom med Jakob til Egyptarland, og som var ætti ifrå han, umfram konone åt sønene hans, var alt i alt seks og seksti sjeler.

²⁷Og sønene åt Josef, som han fekk i Egyptarland, var tvo. Alle som kom til Egyptarland av Jakobs-ætti, var sytti sjeler.

²⁸Og han sende Juda fyre seg til Josef og bad at han vilde syna han vegen til Gosen. Og so kom dei til Gosenlandet.

²⁹Og Josef let setja fyre vogni si og for upp til Gosen, til møtes med Israel, far sin; og med same han fekk sjå han, kasta han seg um halsen på han og gret lenge med armane um halsen hans.

³⁰Då sa Israel til Josef: No vil eg gjerne døy, sidan eg hev set deg i andletet og veit at du endå er i live.

³¹Og Josef sa til brørne sine og farsfolket sitt: No fer eg upp til Farao og bera fram bod um dette og segja: Brørne mine og farsfolket mitt, som var i Kana'ansland, hev kome hit til meg.

³²Og desse mennene er sauehyrdingar; dei hev stødt drive med å ala fe, og sauene og nauti sine og alt det dei eig, hev dei havt med seg hit.

³³Når so Farao kallar dykk til seg og spør: Kva hev de til leveveg?

³⁴so skal de svara: Fehyrdingar hev tenarane dine vore alt ifrå ungdomen og til no, både me og federne våre - so de kann få bu i Gosenlandet; for egyptarane hev ein stygg til alle sauehyrdingar.