Read nynorsk 1938 Andre Samuelsbok 20 Bible Online

Andre Samuelsbok 20 - nynorsk 1938 bible

Andre Samuelsbok 20

¹Men det høvde seg so at det var eit illmenne der som heitte Seba Bikrison og høyrde til Benjamins-ætti. Han bles i luren og ropa: Me hev ingen deil i David og ingen lut i Isai-sonen! Heim att kvar til seg, Israel!

²Då skilde dei lag med David alle Israels-mennene og fylgde Seba Bikrison; men Juda-mennene heldt seg til kongen sin og fylgde han frå Jordan alt til Jerusalem.

³Då David kom heim att til Jerusalem, tok han dei ti fylgjekonone som han hadde late att til å taka vara på kongsgarden, og sette dei i varveitsla i eit hus for seg sjølve; han sytte for alt dei trong, men heldt seg ikkje med dei. Der sat dei no innestengde til sin døyande dag og levde all si tid som enkjor.

⁴Sidan sa kongen til Amasa: Stemn i hop Juda-mennene for meg innan tri dagar og møt so sjølv fram her!

⁵So drog Amasa av stad og stemnde i hop Juda-heren; men han drygde lenger enn den tidi kongen hadde sett.

⁶Då sa David til Abisai: No kjem Seba Bikrison til å gjera oss meir mein enn Absalom. Tak med deg mennene åt herren din og set etter han! Berre han ikkje alt hev vunne seg borger og kome seg undan?

⁷So drog Abisai ut med alle Joabs-mennene og livvakti og alle dei djervaste stridsmennene; dei tok ut frå Jerusalem, vilde elta Seba Bikrison.

⁸Vel dei var komne til den store steinen ved Gibeon, møtte dei Amasa. Joab var klædd i kappa som han jamnast bar, og utanpå hadde han eit belte med eit sverd som hang i ei slira ved sida hans. Då han gjekk fram, datt sverdet ut.

⁹Joab sa til Amasa: Korleis stend det til med deg, bror? og tok med høgre handi kring skjegget hans, liksom han vilde kyssa han.

¹⁰Men Amasa vara seg ikkje for sverdet som Joab hadde i hi handi, og Joab stakk han i buken med det, so innvolen hans rann ut på marki. Han gav han ikkje meir enn den eine styngen; for han døydde med ein gong. Sidan heldt Joab og Abisai, bror hans, ved og elte Seba Bikrison.

¹¹Men ein av sveinane åt Joab vart standande innmed liket og ropa: Kven som held med Joab, og som vil David vel, fylgje Joab!

¹²Medan låg Amasa og valt i blodet sitt midt i ålmannvegen; alle som kom dit, vart standande, og då mannen såg at alt folket stana der, flutte han Amasa frå ålmannvegen burt på marki og kasta ei kappa yver han.

¹³Då liket soleis var havt burt frå ålmannvegen, for kvar mann framum og fylgde Joab medan han elte Seba Bikrison.

¹⁴Han for igjenom alle Israelsfylki til Abel og Bet-Ma'aka og heile Berim; og der og samla dei seg og fylgde han.

¹⁵So kom dei og kringsette han i Abel-Bet-Ma'aka; dei kasta upp ein voll som nådde heilt innåt ytre bymuren, og alt folket som var med Joab, dreiv på og øydela muren, so han skulde falla. /[26]

¹⁶Då var det ei klok kona som ropa frå byen: Høyr her! Høyr her! Bed Joab koma næmare, so eg fær tala med han.

¹⁷Då gjekk han burtåt henne, og kona spurde: Er du Joab? Han svara: Ja. Kona sa: Høyr kva tenestkvinna di hev å segja! Han svara: Ja vel.

¹⁸Då sa ho: Fyrr i tidi pla folk segja: Ein skal spyrja seg fyre i Abel, og so kunde dei gjera det som dei etla seg til.

¹⁹Eg er ein av dei fredsame og trufaste i Israel. Men no freistar du å gjera ende på ein by, ei mor i Israel. Kvifor vil du øyda Herrens eigedom? /[27]

²⁰Joab svara: Nei då, nei då! Eg vil på ingen måte øyda eller tyna.

²¹Det hev seg ikkje so. Men ein mann frå Efra'imsheidi - Seba Bikrison heiter han - hev lyft handi si mot kong David. Lat meg berre få han, so skal eg draga burt frå byen. Då sa kona: Du skal få sjå korleis hovudet hans vert kasta ut til deg yver muren.

²²So gjekk kona med si kloke råd til byfolket, og dei hogg hovudet av Seba Bikrison og kasta det ut til Joab. Då bles han i luren, og dei drog burt frå byen og spreidde seg utyver; kvar for til sin heim. Sjølv for Joab attende til Jerusalem, til kongen.

²³Joab var hovding yver heile Israels-heren, og Benaja Jojadason var hovding yver livvakti;

²⁴Adoram hadde tilsyn med dei som gjorde trælearbeid, og Josafat Akiludsson var sogeskrivar;

²⁵Seja var riksskrivar, og Sadok og Abjatar var prestar.

²⁶Ira av Ja'irs-ætti var og prest hjå David. /[28]