Read nynorsk 1938 Andre Samuelsbok 23 Bible Online

Andre Samuelsbok 23 - nynorsk 1938 bible

Andre Samuelsbok 23

¹Dette er Davids siste ord: So segjer David, Isai-sonen, so segjer mannen som høgt var sett, som var salva av Jakobs Gud, Israels ljuvlege songar:

²Herrens Ande talar gjenom meg, og ordi hans er på mi tunga.

³Israels Gud hev tala, Israels berg hev sagt til meg: Ein rettvis skal råda yver menneskja, ein som rikjer i otte for Gud;

⁴han skal likjast på morgonljoset når soli renn, ein skylaus morgon, når graset gror i sol etter regn.

⁵For so hev mitt hus det med Gud. Ei æveleg pakt hev han gjort med meg, vel skipa i alle måtar og trygg; all mi frelsa og alt som tekkjest han - visseleg let han det gro fram.

⁶Men illmenni, dei er alle lik tornar som vert rudde burt, som folk ikkje tek i med handi;

⁷den som kjem nær dei, væpnar seg med jarn og med spjotskaft, og med eld vert dei uppbrende der dei stend.

⁸Dette er namni på kjempone åt David: Joseb-Bassebet, takmoniten, hovding yver drabantane; han svinga spjotet sitt yver åtte hundrad falne på ein gong.

⁹Etter han kom Eleasar, son åt Dodo, son åt Ahohi; han var ein av dei tri kjempone som var med David då dei hædde filistarane som hadde samla seg der og baud ufred. Israels-mennene drog seg attende,

¹⁰men han reiste seg og hogg innpå filistarane, til handi hans trøytna, so ho stivna til kring sverdet. Den dagen let Herren Israels-mennene vinna ein stor siger, og då folket vende um og fylgde Eleasar, fekk dei ikkje anna å gjera enn å taka dei klædi og våpni som dei falne hadde bore.

¹¹Etter han kom Samma, son åt Age, harariten. Filistarane hadde ein gong samla seg so dei var ein heil hop. Der var ein tett linse-åker. So rømde folket for filistarane,

¹²Då tok Samma støde midt i åkeren og berga han og hogg ned filistarane. Den gongen og let Herren Israels-mennene vinna ein stor siger.

¹³Ein gong som det leid til skurdonni, for tri av dei tretti hovdingane nedetter og kom til David i Adullamshelleren. Ein filistarflokk hadde då lægra seg i Refa'imsdalen.

¹⁴David var den gongen sjølv i borgi, og ein av utpostane åt filistarane var i Betlehem.

¹⁵Då fekk David brått ein sterk hug og sa: Gjev einkvar vilde gjeva meg noko vatn frå brunnen som er innmed porten i Betlehem!

¹⁶Dei tri kjempone braut seg gjenom filistarlægret og auste upp vatn or portbrunnen i Betlehem og tok det med seg og kom til David med det. Men han vilde ikkje drikka det - han auste det ut for Herren.

¹⁷Og han sa: Herre, fria meg frå å gjera slikt! Skulde eg drikka blodet åt dei mennene som våga livet sitt på den ferdi? Han vilde ikkje drikka det. Dette gjorde dei tri kjempone.

¹⁸So var det Abisai, bror åt Joab og son åt Seruja; han var hovding yver drabantane. Han svinga spjotet sitt yver tri hundrad falne. Han hadde eit stort namn millom dei tri.

¹⁹Framfor dei tretti var han nok æra og vart hovdingen deira; men han nådde ikkje so høgt som dei tri.

²⁰So det var Benaja Jojadason; han var son åt ein djerv og dådrik stridsmann frå Kabse'el. Han felte båe løvekjempone frå Moab. Ein snøversdag steig han ned i ein brunn og drap ei løva.

²¹Like eins slo han i hel ein egyptar, ein kjempestor kar. Egyptaren hadde eit spjot i handi, men Benaja gjekk på han med staven sin, reiv spjotet ut or handi hans og drap han med hans eige spjot.

²²Dette gjorde Benaja Jojadason. Han hadde eit stort namn millom dei tri kjempone.

²³Framfor dei tretti var han æra, men han nådde ikkje so høgt som dei tri. David gav han rom millom næmaste rådgjevarane sine.

²⁴Til dei tretti høyrde Asael, bror åt Joab; like eins Elhanan Dodoson frå Betlehem;

²⁵Samma frå Harod; Elika frå Harod;

²⁶Heles, paltiten; Ira Ikkesson frå Tekoa;

²⁷Abieser frå Anatot; Mebunnai av Husa-ætti;

²⁸Salmon, ahohiten; Maharai frå Netofa;

²⁹Heleb Ba'anason frå Netofa; Ittai Ribaison frå Gibea i Benjaminsfylket;

³⁰Benaja frå Piraton; Hiddai frå Ga'as-dalane;

³¹Abi-Albon, arbatiten; Asmavet frå Barhum;

³²Eljahba, sa'alboniten; Bene-Jasen; Jonatan;

³³Samma av Harar-ætti; Akiam Sararsson av Arar-ætti;

³⁴Elifelet, son åt Ahasbai, son åt ma'akatiten; Eliam Akitofelsson frå Gilo;

³⁵Hesro frå Karmel; Pa'arai, arbiten;

³⁶Jigal Natansson frå Soba; Bani frå Gadsfylket;

³⁷Selek, ein ammonit; Naharai frå Be'erot, våpensveinen åt Joab Serujason;

³⁸Ira frå Jattir; Gared frå Jattir;

³⁹Uria, hetiten - i alt sju og tretti.