Read nynorsk 1938 Andre Samuelsbok 8 Bible Online

Andre Samuelsbok 8 - nynorsk 1938 bible

Andre Samuelsbok 8

¹Sidan vann David på filistarane og døyvde dei - han tok hovudstadstaumane ut or hendene deira.

²Moabitane vann han og på og mælte dei med ei snor - han baud dei leggja seg ned på jordi og mælte so ut tvo snorlengder med folk som skulde drepast, og ei full snorlengd med folk som skulde få leva; då gav moabitane seg under David og laut svara skatt.

³Like eins vann David på Hadadeser Rehobsson, kongen i Soba, då han drog av stad og vilde vinna att makti si ved elvi. /[11]

⁴David tok ifrå han syttan hundrad mann av hestfolket og tjuge tusund av fotfolket; vognhestane skar han av hasane på og sparde ikkje att meir enn hundrad av dei.

⁵Då syrarane frå Damaskus kom og vilde hjelpa Hadadeser, kongen i Soba, felte David tvo og tjuge tusund mann av heren deira;

⁶sidan la David hervakter i Damaskus-Syria, og syrarane gav seg under han og laut svara skatt. Soleis hjelpte Herren David kvar helst han for fram.

⁷David tok dei gullskjoldane som Hadadeser-mennene hadde bore, og hadde dei med seg til Jerusalem.

⁸Og frå Betah og Berotai, byane åt Hadadeser, tok kong David uhorveleg mykje kopar.

⁹Då To'i, kongen i Hamat, høyrde at David hadde gjort ende på heile Hadadeser-heren,

¹⁰sende han Joram, son sin, til kong David - han skulde helsa på han og ynskja han til lukka med di han hadde vunne i striden mot Hadadeser; for Hadadeser hadde stødt lege i ufred med To'i. Han hadde med seg eigneluter av sylv og gull og kopar. /[12]

¹¹Dei og helga kong David til Herren i hop med det sylvet og gullet han helga av herfanget frå alle dei heidningfolki han hadde lagt under seg;

¹²frå Syria og frå Moab og frå Ammons-borni og frå filistarane og frå amalekitane og av herfanget frå Hadadeser Rehobsson, kongen i Soba.

¹³Eit stort namn vann David då han på heimvegen frå syrar-slaget slo attan tusund mann i Saltdalen. /[13]

¹⁴Han la hervakter i Edom; i heile Edom la han hervakter, og alle edomitane gav seg under han. Soleis hjelpte Herren David kvar helst han for fram.

¹⁵So rådde no David yver heile Israel, og David gjorde rettferd mot heile folket sitt.

¹⁶Joab, son åt Seruja, var hovding yver heren, og Josafat, son åt Akilud, var sogeskrivar;

¹⁷Sadok, son åt Akitub, og Akimelek, son åt Abjatar, var prestar og Seraja riksskrivar;

¹⁸Benaja, son åt Jojada, var hovding yver livvakti, og sønene åt David var prestar. /[14]