Read nynorsk 1938 Andre Samuelsbok 9 Bible Online

Andre Samuelsbok 9 - nynorsk 1938 bible

Andre Samuelsbok 9

¹Ein dag sa David: Tru det endå er nokon att av Sauls-ætti? - då vil eg gjera vel mot han for Jonatans skuld.

²No hadde Sauls-ætti ein tenestmann som heitte Siba. Han vart kalla fram for David, og kongen sa til han: Er du Siba? Han svara: Ja, tenaren din heiter so.

³Då sa kongen: Er det ingen att meir av Sauls-ætti, so eg kann få gjort Guds miskunn mot han? Siba svara: Det er att ein son åt Jonatan, ein som er lam i båe føtene.

⁴Kongen spurde: Kvar er han? Siba svara: Han er hjå Makir Ammielsson i Lo-Debar.

⁵Då sende kong David bod etter han. Dei som bar bodet, fann han i Lo-Debar, hjå Makir Ammielsson, og tok han med seg attende.

⁶Då han - Mefiboset, son åt Jonatan Saulsson - kom inn til David, la han seg på kne og bøygde seg med andletet mot jordi, og David sa: Mefiboset! Han svara: Ja, her er tenaren din.

⁷David sa til han: Du tarv ikkje reddast; eg vil gjera vel mot deg for skuld Jonatan, far din; eg vil lata deg få att all jordeigedomen som Saul, farfar din, hev havt, og du skal allstødt eta ved mitt bord.

⁸Då bøygde han seg atter og sa: Kva er eg, tenaren din? Kvifor bryr du deg um ein daud hund som meg?

⁹So sende kongen bod etter Siba, han som hadde vore tenaren åt Saul, og sa til han: Alt det som hev høyrt Saul og heile ætti hans til, gjev eg son åt husbonden din.

¹⁰Du skal bruka jordi for han, du og sønene og drengene dine, og hausta inn det ho ber; det skal vera til kost og levemåte for son åt husbonden din; men sjølv skal Mefiboset, son åt husbonden din, allstødt eta ved mitt bord. Siba hadde femtan søner og tjuge drenger.

¹¹Han svara kongen so: Tenaren din skal i alle måtar gjera som du, herre konge, segjer tenaren din fyre. Men Mefiboset skal eta ved mitt bord, liksom han var ein av kongssønene [sa kongen].

¹²Mefiboset hadde ein liten son som heitte Mika. Elles var alt husfolket åt Siba tenarar for Mefiboset.

¹³Men sjølv budde Mefiboset i Jerusalem, av di han stendigt åt ved kongens bord; og han var lam i båe føtene.