Read nynorsk 1938 Fyrste Kongebok 4 Bible Online

Fyrste Kongebok 4 - nynorsk 1938 bible

Fyrste Kongebok 4

¹Kong Salomo var konge yver heile Israel.

²No skal me nemna dei fremste mennene hans: Asarja Sadoksson var prest; /[5]

³Elihoref og Akia, søner åt Sisa, var riksskrivarar; Josafat Akiludsson var sogeskrivar;

⁴Benaja Jojadason var hovding yver heren; Sadok og Abjatar var prestar;

⁵Asarja Natansson, var formann for futane; Sabud Natansson var prest og ven åt kongen; /[6][7]

⁶Akisar var slottshovding; Adoniram Abdason hadde tilsyn med dei som gjorde trælearbeid. /[8]

⁷Salomo hadde sett tolv futar yver heile Israel. Dei sytte for mat og drikke åt kongen og huset hans; kvar sin månad i året laut dei syta for det.

⁸Her er namni deira: Son åt Hur, i Efra'imsheidi;

⁹son åt Deker i Makas og Sa'albim og Bet-Semes og Elon-Bet-Hanan;

¹⁰son åt Hesed i Arubbot; han hadde Soko og heile Heferbygdi;

¹¹son åt Abinadab hadde heile Dorhøglendet; Tafat, dotter åt Salomo, var kona hans;

¹²Ba'ana Akiludsson, hadde Ta'anak, Megiddo og heile Bet-Sean, som ligg jamsides med Sartan, nedanfor Jisre'el, frå Bet-Sean til Abel-Mehola og burtum Jokmeam;

¹³son åt Geber i Ramot i Gilead; han hadde byane åt Ja'ir, son åt Manasse, i Gilead, og Argobbygdi i Basan, seksti store byar med murar og koparslåer;

¹⁴Akinadab Iddoson hadde Mahana'im;

¹⁵Akima'as i Naftalifylket; han hadde og fenge ei dotter åt Salomo til kona, ho heitte Basmat;

¹⁶Ba'ana Husaisson, i Asersfylket og i Alot;

¹⁷Josafat Paruahsson, i Issakarsfylket;

¹⁸Sime'i Elason i Benjaminsfylket;

¹⁹Geber Urison i Gileadlandet - det landet som Sihon, kongen yver amoritane, og Og, kongen i Basan, hadde havt - han var einaste futen i dei bygdene.

²⁰Juda og Israel var mange - so mange som sand i strand; dei åt og drakk og var glade.

²¹Salomo rådde yver alle kongeriki frå elvi til Filistarlandet og alt åt bytet med Egyptarland; dei kom med gåvor og lydde Salomo so lenge han levde. /[9]

²²Til kosthaldet hjå Salomo gjekk det kvar dag med tretti kor fint mjøl og seksti kor vanleg mjøl,

²³ti gjødde uksar, tjuge drifteuksar, og hundrad sauer, umfram hjortar og rådyr og dådyr og gjødde fuglar.

²⁴For han rådde yver alt land vestanfor elvi, frå Tifsah til Gasa, yver alle kongane vestanfor elvi, og hadde fred på alle kantar rundt ikring;

²⁵og kvar mann i Juda og Israel, frå Dan til Be'erseba, sat trygt under vintreet og fiketreet so lenge Salomo levde.

²⁶Salomo hadde fyrti tusund stallrom for vognhestane sine og tolv tusund hestfolk.

²⁷Dei futane me hev nemnt, sytte kvar sin månad for mat og drikke åt kong Salomo og alle som gjekk til hans bord; dei let det ikkje skorta på nokon ting.

²⁸Og bygget og halmen til vognhestane og tråvarane førde dei dit det skulde vera, kvar etter som han var fyresagd.

²⁹Gud gav Salomo visdom og ovstor kunnskap og eit vit som femnde vidt, liksom sanden på havsens strand.

³⁰Salomos visdom var større enn visdomen åt alle austmennene og større enn all visdomen åt egyptarane.

³¹Han var visare enn alle menneske - visare enn Etan av Esrah-ætti og Heman og Kalkol og Darda, Maholssønene og han var namnspurd hjå alle folkeslagi rundt ikring.

³²Han laga tri tusund ordtøke, og kvedi hans var eit tusund og fem i talet.

³³Han tala um trei, frå sederen på Libanon til isopen som sprett utor muren, og han tala um dyri og fuglane og kreket og fiskane.

³⁴Frå alle land kom det folk og vilde høyra visdomen åt Salomo, frå alle kongar på jordi som hadde høyrt gjete um visdomen hans.