Read nynorsk 1938 Andre Kongebok 12 Bible Online

Andre Kongebok 12 - nynorsk 1938 bible

Andre Kongebok 12

¹Det var i sjuande året av Jehus kongedøme Joas vart konge, og han rådde i Jerusalem i fyrti år. Mor hans heitte Sibja og var frå Be'erseba.

²Joas gjorde det som rett var i Herrens augo, heile tidi, so lenge Jojada, presten, rettleidde han -

³so nær som at offerhaugane ikkje vart nedlagde; folket heldt ved og ofra slaktoffer og brende røykjelse på haugane.

⁴Joas sa til presten: Dei heilage gåvone som kjem inn til Herrens hus i pengar - både pengane frå dei som kjem med i manntalet, og takstpengane for folk som vert utløyste, og alle pengane som nokon sjølvmint kjem til Herrens hus med - /[19][20]

⁵dei skal prestane taka imot, kvar av dei folki han kjenner, og so skal dei bøta brestene i Herrens hus kvar det finst nokon brest.

⁶Men i tri og tjugande året av Joas' kongedøme hadde prestane endå ikkje bøtt brestane i huset.

⁷Då kalla Joas presten Jojada og dei andre prestane fyre seg og sa til dei: Kvifor bøter de ikkje brestane i Herrens hus? Heretter skal de ikkje taka imot pengar av kjenningane dykkar, men gjeva dei frå dykk til å vøla templet med.

⁸So gjekk prestane med på at dei ikkje skulde taka imot pengar av folket, men so skulde dei ikkje heller hava noko med å vøla huset.

⁹Og Jojada, presten, tok ei kista og bora hol i loket og sette henne innmed altaret på høgre sida, der som folk gjeng inn i Herrens hus. I den la prestane som heldt vakt ved dørstokken, alle pengar som kom inn til Herrens hus.

¹⁰Når dei då såg at det var mange pengar i kista, gjekk skrivaren åt kongen dit upp saman med øvstepresten og knytte dei inn og talde dei pengane som fanst i Herrens hus.

¹¹So gav dei pengane som dei hadde vege, i hendene på dei som stod fyre arbeidet og hadde tilsyn med Herrens hus, og DEI greidde dei ut til timbremennene og bygningsmennene som arbeidde på Herrens hus,

¹²og til murarane og steinhoggarane, eller nytta dei til å kjøpa trevyrke og hoggen stein, so brestene i Herrens hus kunde verta bøtt - til alt som laut kostast på huset, so det kunde setjast i stand att.

¹³Det vart ikkje gjort sylvfat eller knivar eller blodbollar eller lurar eller noko slag ting i gull eller sylv åt Herrens hus for dei pengane som kom inn til det;

¹⁴dei vart gjevne til dei som stod fyre arbeidet, og nytta til å vøla på Herrens hus.

¹⁵Det vart ikkje kravt rekneskap av dei mennene som tok imot pengane og skulde gjeva dei til arbeidsfolket; for dei for ærleg fram.

¹⁶Men skuldoffer- og syndofferpengane kom ikkje inn til Herrens hus; det var prestane som fekk dei.

¹⁷På den tidi gjorde Hasael, kongen i Syria, ei herferd mot Gat, og då han hadde vunne den byen, etla han seg til å ganga mot Jerusalem.

¹⁸Då tok Joas, Juda-kongen, alle dei heilage gåvone som federne hans, Juda-kongane Josafat og Joram og Akasja, hadde helga, og dei han sjølv hadde helga, og alt gull som fanst i skattkammeri i Herrens hus og i kongsgarden, og sende det til Hasael, syrarkongen. So drog han burt og gjekk ikkje mot Jerusalem.

¹⁹Det som ellers er å segja um Joas og alt det han gjorde, det stend skrive i krønikeboki åt Juda-kongane.

²⁰Hirdmennene åt Joas gjorde uppreist og laga ei samansverjing og drap han i Millo-huset, som gjeng ned til Silla.

²¹Dei hirdmennene som slo han i hel, heitte Josakar Sim'atsson og Josabad Somersson. Han vart gravlagd hjå federne sine i Davidsstaden, og Amasja, son hans, vart konge etter han.