Read nynorsk 1938 Andre Kongebok 16 Bible Online

Andre Kongebok 16 - nynorsk 1938 bible

Andre Kongebok 16

¹Det var i syttande året av Pekah Remaljasons kongedøme Akas vart konge; han var son åt Jotam, Juda-kongen.

²Akas var tjuge år gamal då han tok styret, og han sat sekstan år konge i Jerusalem. Han gjorde ikkje det som rett er for Herren hans Gud, som David, ættefaren hans,

³men fylgde i fotfaret åt Israels-kongane. Han let jamvel son sin ganga gjenom elden etter dei avstyggelege skikkane som var hjå dei folki Herren hadde drive burt for Israels-borni;

⁴og han ofra slaktoffer og brende røykjelse på haugane og bakkane og under kvart grønt tre.

⁵På den tidi gjorde Resin, kongen i Syria, og Pekah Remaljason, Israels-kongen, ei herferd mot Jerusalem. Dei kringsette Akas, men vann ikkje gjera noko åtak. /[25]

⁶På same tidi vann Resin, syrarkongen, Elat att åt Syria; han dreiv jødane ut or Elat, og syrarane kom og busette seg der og hev vorte buande der til denne dag.

⁷Akas sende bod til Tiglat-Pileser, kongen i Assyria, og let segja: Eg er din tenar og din son; kom og frels meg frå syrarkongen og Israels-kongen! Dei hev yppa ufred med meg.

⁸Og Akas tok alt sylvet og gullet i Herrens hus og i skattkammeri i kongsgarden og sende det til assyrarkongen i gåva.

⁹Assyrarkongen gjorde som han bad; han gjekk mot Damaskus og hertok byen; folket som budde der, førde han burt til Kir, og Resin tok han livet av.

¹⁰So for kong Akas til Damaskus og vilde møta Tiglat-Pileser, assyrarkongen. Då han fekk sjå altaret som var der, sende han Uria, presten, ei teikning av det og eit bilete som synte korleis det i alle måtar var gjort.

¹¹Og Uria, presten, bygde eit altar som svara heiltupp til det biletet som Akas hadde sendt frå Damaskus; det fekk han gjort innan kong Akas kom att frå Damaskus.

¹²Då kongen kom heim att frå Damaskus og såg altaret, gjekk han fram til det og ofra på det.

¹³Han brende brennofferet og matofferet sitt og auste ut drykkofferet sitt og skvette blodet av takkofferet sitt på altaret.

¹⁴Men koparaltaret, som stod framfor Herrens åsyn, flutte han frå romet sitt framfor huset - romet millom det nye altaret og Herrens hus - og sette det på nordsida av det nye altaret.

¹⁵So gav Uria, presten, sovori fyresegn: På det store altaret skal du brenna morgon-brennofferet og kvelds-matofferet og brennofferet frå kongen og matofferet hans og brennofferet for heile landslyden og matofferet deira og drykkofferet deira, og blodet av brennofferi og av slaktofferi skal du skvetta på det; men koparaltaret vil eg hava til å halda bøn innmed.

¹⁶Og Uria, presten, gjorde i alle måtar som kong Akas hadde sagt han fyre.

¹⁷Kong Akas skar og fyllingane ut or fotstykki og tok burt balja som stod på kvar av dei. Like eins tok han det støypte havet ned av koparuksane som det kvilde på, og sette det på eit steingolv.

¹⁸Og sabbats-svalgangen som dei hadde bygt innmed huset og tekt yver, og den ytre kongeinngangen la han inn i Herrens hus for assyrarkongen skuld.

¹⁹Det som meir er å segja um Akas, um det han gjorde, det stend skrive i krønikeboki åt Juda-kongane.

²⁰So for Akas til federne sine og vart gravlagd hjå federne sine i Davidsstaden. Esekias, son hans, vart konge etter han.