Read nynorsk 1938 Andre Kongebok 20 Bible Online

Andre Kongebok 20 - nynorsk 1938 bible

Andre Kongebok 20

¹Ved det leitet vart Esekias so sjuk at det stod um livet. Og Esaias Amosson, profeten, kom til han og sa til han: So segjer Herren; Skipa alle ting til rettes i huset ditt! For du lyt døy; du fær ikkje leva lenger.

²Då snudde Esekias andletet mot veggen og bad soleis til Herren:

³Å Herre, kom då i hug at eg hev ferdast for di åsyn i truskap og med heilt hjarta og gjort det som godt er i dine augo! Og han storgret.

⁴So hende det, fyrr Esaias var komen ut or den indre byen, at det kom eit ord til han frå Herren; det lydde so:

⁵Gakk attende og seg til Esekias, fyrsten yver folket mitt: So segjer Herren, Gud åt David, far din: Eg hev høyrt bøni di og set tårone dine, og no vil eg gjera deg god att - tridje dagen frå no kann du ganga upp til Herrens hus.

⁶Og eg vil leggja femtan år attåt alderen din og berga deg og denne byen frå assyrarkongen og veldet hans; eg vil verna denne byen for mi eigi skuld og for Davids skuld, han som var tenaren min.

⁷So sa Esaias: Kom med ei fikekaka! So gjorde dei det og la fikekaka på verken. Då friskna Esekias til att,

⁸og han sa til Esaias: Kva skal eg hava til merke på at Herren vil gjera meg god att, so eg kann ganga upp til Herrens hus tridje dagen?

⁹Esaias svara: No skal du høyra kva merke Herren gjev deg på at han vil halda det han hev lova: Skal skuggen ganga ti strek fram eller ti strek attende?

¹⁰Esekias sa: Det er uvandt for skuggen å tøygja seg ti strek fram; nei, han lyt ganga ti strek attende.

¹¹Då ropa profeten Esaias til Herren, og HAN let skuggen ganga dei same streki attetter som han nyst hadde gjenge ned på solskiva åt Akas - ti strek.

¹²Ved det leitet sende Berodak Baladan, son åt Baladan og konge i Babel, nokre menner med brev og gåvor til Esekias; for han hadde høyrt at han hadde vore sjuk.

¹³Då Esekias hadde høyrt på dei, synte han dei heile skatthuset sitt, sylvet og gullet og dei angande kryddone og den kostesame oljen og heile våpnhuset sitt og alt det som var i skattkammeri hans; det fanst ikkje ein ting i hans hus og i heile hans rike anna han let dei få sjå det.

¹⁴Då kom profeten Esaias til kong Esekias og spurde han: Kva sa desse mennene, og kvar kom dei frå til deg? Esekias svara: Dei kom frå eit land langt burte - frå Babel.

¹⁵Hin spurde: Kva fekk dei sjå i huset ditt? Esekias svara: Alt som er i huset mitt, fekk dei sjå; det fanst ikkje den ting i skattkammeri mine som eg ikkje synte dei.

¹⁶Då sa Esaias til Esekias: Høyr no Herrens ord!

¹⁷Det kjem ei tid då alt det som finst i huset ditt, og alle skattane som federne dine hev samla alt til denne dag, skal førast burt til Babel; det vert ingen ting att, segjer Herren.

¹⁸Og sume av sønene dine som skal ættast frå deg, som du vert far til, skal dei taka og gjera til hirdmenner i slottet åt kongen i Babel.

¹⁹Esekias svara: Det ordet du segjer meg frå Herren, er godt. Og han la til: Er det ikkje godt, når det fær vera fredleg og trygt so lenge eg lever?

²⁰Det som meir er å segja um Esekias og alle storverki hans, og korleis han laga dammen og vassleidingi og leidde vatnet inn i byen, det stend skrive i krønikeboki åt Juda-kongane.

²¹So for Esekias til federne sine, og Manasse, son hans, vart konge etter han.