Read nynorsk 1938 Fyrste Krønikebok 10 Bible Online

Fyrste Krønikebok 10 - nynorsk 1938 bible

Fyrste Krønikebok 10

¹Filistarane gjekk på i striden mot Israel; Israels-mennene rømde for dei, og det låg mange falne på Gilboafjellet.

²Filistarane sette etter Saul og sønene hans, og dei felte Jonatan og Abinadab og Malkisua, Sauls-sønene.

³Striden vart hard ikring Saul, bogeskyttarane kom yver han, og han fekk ein støkk i seg for skyttarane.

⁴Då sa han til våpensveinen sin: Drag sverdet ditt og renn det igjenom meg, so ikkje desse u-umskorne skal koma og skamfara meg. Men våpensveinen vilde ikkje gjera det - han torde ikkje. Då tok Saul sverdet sitt og stupte seg på det;

⁵og då våpensveinen såg at han slokna, stupte han seg og på sitt sverd og døydde.

⁶Soleis døydde Saul og dei tri sønene hans og heile hans hus; dei let livet saman.

⁷Og då alle dei Israels-mennene som budde i dalen, såg at dei hadde rømt, og at Saul og sønene hans var falne, tok dei ut og rømde frå byane sine, og filistarane kom og slo seg ned der.

⁸Dagen etter kom filistarane og vilde rana det dei falne hadde på seg. Då fann dei Saul og sønene hans liggjande på Gilboafjellet.

⁹Dei rana alt han hadde på seg, og tok hovudet hans og våpni hans og sende bod ikring i Filistarlandet og kunngjorde fagnadtidendi for avgudane sine og for folket.

¹⁰So la dei våpni hans gudshuset sitt, og hausen hans hengde dei upp i Dagons-templet.

¹¹Då heile Jabes i Gilead fekk spurt alt det filistarane hadde gjort med Saul,

¹²drog dei i veg, alle som våpnføre var. Dei tok liki av Saul og sønene hans og førde dei til Jabes. Sidan jorda dei beini deira under terebinta i Jabes og heldt fasta i sju dagar.

¹³Soleis laut Saul lata livet for di han hadde svike Herren og ikkje halde seg etter Herrens ord, og like eins for di han hadde spurt slike som mana fram daudingar og søkt råd hjå dei,

¹⁴men ikkje søkt råd hjå Herren. Difor var det Herren laga det so at han døydde, og kongedømet vart flutt yver på David Isaison.