Read nynorsk 1938 Fyrste Krønikebok 14 Bible Online

Fyrste Krønikebok 14 - nynorsk 1938 bible

Fyrste Krønikebok 14

¹Hiram, kongen i Tyrus, skikka sendemenner til David med sedertre; han sende og steinhoggarar og timbremenner, som skulde byggja eit hus åt han.

²Og David skyna at Herren hadde stadfest kongedømet hans yver Israel; for riket hans hadde vorte lyft høgt for hans eige folk, Israels skuld.

³I Jerusalem tok David seg endå fleire konor, og han fekk endå fleire søner og døtter.

⁴So er namni på dei sønene han fekk i Jerusalem: Sammua og Sobab og Natan og Salomo

⁵og Jibhar og Elisua og Elpelet

⁶og Nogah og Nefeg og Jafia

⁷og Elisama og Be'eljada og Elifelet.

⁸Då filistarane høyrde at David var salva til konge yver heile Israel, drog dei ut alle saman og vilde freista å få tak i han; og då David fekk vita det, drog han ut imot dei.

⁹So kom filistarane og spreidde seg utyver i Refa'imsdalen.

¹⁰Då spurde David Gud: Skal eg draga ut mot filistarane? Vil du gjeva dei i mine hender? Og Herren svara: Drag du ut! Eg vil gjeva dei i dine hender.

¹¹So drog dei upp til Ba'al-Perasim. Der slo David dei. Då sa han: Gud hev brote seg igjenom fiendane mine med mi hand, liksom vatn bryt igjenom. Difor var det den staden fekk namnet Ba'al-Perasim.

¹²Dei let etter seg gudane sine der, og David let mennene sine kasta dei på elden og brenna dei upp.

¹³Men filistarane kom att og spreidde seg på nytt lag utyver i dalen.

¹⁴So spurde David Gud att, og Gud svara: Du skal ikkje draga upp etter dei; snu deg frå dei og gakk utanikring, og gyv so på dei midt for baka-trei!

¹⁵Når du høyrer ljoden av steg i toppane på baka-trei, då lyt du brjota fram i striden; for då hev Gud drege ut framfyre deg og vil slå filistarheren.

¹⁶So gjorde David som Gud hadde sagt til han, og dei slo filistarheren og elte dei frå Gibeon og alt til Geser.

¹⁷Og Davids namn for um alle land, og Herren let det koma ei redsla for han yver alle folkeslag.