Read nynorsk 1938 Fyrste Krønikebok 15 Bible Online

Fyrste Krønikebok 15 - nynorsk 1938 bible

Fyrste Krønikebok 15

¹Sidan bygde han seg fleire hus i Davidsstaden, og han stelte til eit rom åt Guds kista og sette upp eit tjeld åt henne.

²Den gongen sa David: Ingen utan levitane må bera Guds kista; for dei hev Herren valt ut til å bera Guds kista og til å tena han i all æva.

³David stemnde heile Israel i hop til Jerusalem; dei skulde vera med og føra Herrens kista upp til det romet han hadde stelt til åt henne.

⁴So kalla han saman Arons-sønene og levitane:

⁵av Kehats-sønene Uriel, hovdingen, og brørne hans, hundrad og tjuge i talet;

⁶av Merari-sønene Asaja, hovdingen, og brørne hans, tvo hundrad og tjuge i talet;

⁷av Gersoms-sønene Joel, hovdingen, og brørne hans, hundrad og tretti talet;

⁸av Elisafans-sønene Semaja, hovdingen, og brørne hans, tvo hundrad i talet;

⁹av Hebrons-sønene Eliel, hovdingen, og brørne hans, åtti i talet;

¹⁰av Ussiels-sønene Amminadab, hovdingen, og brørne hans, hundrad og tolv i talet.

¹¹So kalla David til seg prestane Sadok og Ebjatar og levitane Uriel og Asaja og Joel og Semaja og Eliel og Amminadab

¹²og sa til dei: De er hovdingar for ættgreinene åt levitane. Helga dykk no, både de og brørne dykkar, og før so kista åt Herren, Israels Gud, upp til det romet eg hev stelt til åt henne!

¹³Det var av di de ikkje var med fyrre gongen at Herren vår Gud braut inn i flokken vår; for me søkte han ikkje på rette måten.

¹⁴Då helga dei seg, prestane og levitane, so dei kunde føra kista åt Herren, Israels Gud, upp dit ho skulde.

¹⁵Og levit-sønene bar Guds kista på herdane sine etter berestengene, soleis som Moses hadde sagt dei fyre etter Herrens ord.

¹⁶So baud David levithovdingane at dei skulde lata songarane i ætti si stiga fram med spelgogner, harpor og citarar og cymblar, som dei skulde låta på medan dei let gledesongen ljoma.

¹⁷Då let levitane Heman Joelsson stiga fram, og av hans brør Asaf Berekjason, og av Merari-sønene, brørne deira, Etan Kusajason,

¹⁸og saman med dei brørne deira i andre rekkja, Sakarja og Ben og Ja'asiel og Semiramot og Jehiel og Unni og Eliab og Benaja og Ma'aseja og Mattitja og Eliflehu og Mikneja og Obed-Edom og Je'iel, portvaktarane.

¹⁹Songarane Heman og Asaf og Etan skulde slå på koparcymblar.

²⁰Sakarja og Asiel og Semiramot og Jehiel og Unni og Eliab og Ma'aseja og Benaja skulde spela på harpor etter Alamot, /[36]

²¹og Mattitja og Eliflehu og Mikneja og Obed-Edom og Je'iel og Asasja skulde spela på citarar etter Sjeminit og styra songen. /[37]

²²Kenanja, songmeisteren åt levitane, lærde dei andre upp i songen; for han var kunnig i slikt.

²³Berekja og Elkana var dørvaktarar ved kista.

²⁴Prestane Sebaina og Josafat og Netanel og Amasai og Sakarja og Benaja og Elieser bles i lur framfor Guds kista, og Obed-Edom og Jehia var og dørvaktarar ved kista.

²⁵So tok David i vegen, både han og Israels styresmenner og dei øvste hovdingane; og skulde henta Herrens paktkista med fagnad upp frå huset til Obed-Edom.

²⁶Og for di Gud hjelpte levitane som bar Herrens paktkista, ofra dei sju uksar og sju verar.

²⁷David var klædd i ei kappa av kvitt bomullsty, og like eins alle dei levitane som bar kista, og songarane og Kenanja, songmeisteren, som styrde songen; dessutan bar David ei prestekåpa av lereft.

²⁸So førde då heile Israel Herrens paktkista upp med fagnadrop og lurlåt, og dei bles i trompetar og slo på cymblar og spela på harpa og citar.

²⁹Men då Herrens paktkista vart bori inn i Davidsstaden, bar det so til at Mikal Saulsdotter skoda ut gjenom vindauga, og då ho såg korleis kong David hoppa og dansa, vanvyrde ho han i sitt hjarta.