Read nynorsk 1938 Fyrste Krønikebok 22 Bible Online

Fyrste Krønikebok 22 - nynorsk 1938 bible

Fyrste Krønikebok 22

¹David sa: Her skal det standa, huset åt Herren Gud, og her skal Israel hava brennofferaltaret sitt.

²So baud han at dei framande som budde i Israelslandet, skulde kallast i hop, og han sette steinhoggarar til å hogga til den steinane som Guds hus skulde byggjast av.

³Han drog og i hop ovmykje jarn til naglar i portdørene og til kjengar, og ei slik ovmengd med kopar at han ikkje var vegande,

⁴og so mange sederbjelkar at det ikkje var tal på dei; for sidonarane og Tyrus-mennene førde ovmykje sedertre til David.

⁵For David tenkte med seg: Salomo, son min, er ung og kløkk. Men huset som skal byggjast åt Herren, lyt gjerast ovende stort, so det kann vera til gjetord og æra for han i alle land. Difor vil eg samla vyrke åt han! So drog han i hop ovmykje vyrke fyrr han døydde.

⁶Ein dag kalla han til seg Salomo, son sin, og bad han byggja eit hus åt Herren, Israels Gud.

⁷David sa til Salomo, son sin: Eg hadde sjølv tenkt meg til å byggja eit hus for namnet åt Herren min Gud;

⁸men då kom det eit ord til meg frå Herren, og det lydde so: Du hev rent ut mykje blod og gjort store herferder. Du skal ikkje byggja noko hus for namnet mitt; sidan du hev rent so mykje blod på jordi for mi åsyn.

⁹Men du skal få ein son, som skal vera ein fredsæl mann, og han vil eg lata få fred for alle fiendane sine rundt ikring; for Salomo skal han heita, og eg vil lata Israel hava fred og ro i hans dagar. /[40]

¹⁰Han skal byggja eit hus for namnet mitt. Han skal vera son min, og eg skal vera far hans, og eg vil tryggja kongsstolen hans i Israel for all tid.

¹¹So vere då Herren med deg, son min! Gjev du må hava lukka med deg og få byggja huset åt Herren din Gud, soleis som han hev tala um deg!

¹²Berre no Herren vil gjeva deg visdom og vit når han set deg yver Israel, og at du må halda lovi åt Herren din Gud!

¹³Då kjem du til å hava lukka med deg - når du aktar vel på å leva etter dei bodi og lovene som Herren let Moses kunngjera for Israel. Ver sterk og stød! Du skal ikkje reddast og ikkje fæla.

¹⁴Her hev eg med stor møda drege i hop åt Herrens hus hundrad tusund talent gull og tusund gonger tusund talent sylv, og dessutan meir kopar og jarn enn ein kann vega; so mykje er det. Trevyrke og stein hev eg og fenge fram, og meir kann du sjølv leggja attåt.

¹⁵Arbeidsfolk hev du og i flokketal, steinhoggarar og murarar og timbremenner og dertil allslags folk som er kunnige i alle andre slag arbeid.

¹⁶Av gull og sylv og kopar og jarn er her so mykje at det ikkje er teljande. So tak då på med verket, og Herren vere med deg!

¹⁷So baud David alle Israels hovdingar at dei skulde hjelpa Salomo, son hans, og sa:

¹⁸Ser de ikkje at Herren dykkar Gud er med dykk og hev gjeve dykk ro på alle leidar? For dei folki som fyr åtte heime i landet, hev han gjeve i mitt vald, og landet er lagt under Herren og folket hans.

¹⁹So legg no dykkar hjarta og hug på å søkja Herren dykkar Gud, og gjer dykk reiduge og bygg heilagdomen åt Herren Gud, so de kann få flutt Herrens paktkista og dei heilage gognene som høyrer til gudstenesta, inn i det huset som skal byggjast åt Herrens namn!