Read nynorsk 1938 Fyrste Krønikebok 23 Bible Online

Fyrste Krønikebok 23 - nynorsk 1938 bible

Fyrste Krønikebok 23

¹Då David var gamal og mett av dagar, sette han Salomo, son sin, åt konge yver Israel.

²So kalla han i hop alle hovdingane i Israel og prestane og levitane.

³Levitane vart talde, so mange som var tjuge år gamle eller meir, og talet på dei vart, då kvar karmann vart rekna, åtte og tretti tusund.

⁴Av desse [sa David] skal fire og tjuge tusund standa fyre arbeidet på Herrens hus, og seks tusund skal vera tilsynsmenner og domarar;

⁵fire tusund skal vera portvaktarar, og fire tusund skal lovsyngja Herren til dei spelgognene som eg hev late gjera til lovsongen.

⁶So bytte David dei i skift etter namni på sønene åt Levi: Gerson, Kehat og Merari.

⁷Til gersonitane høyrde Ladan og Sime'i.

⁸Sønene hans Ladan var Jehiel, som var hovdingen, og Setam og Joel - tri i talet.

⁹Sønene hans Sime'i var Selomot og Hasiel og Haran - tri i talet; dette var hovdingane for Ladans-ættgreinene.

¹⁰Og sønene åt Sime'i var Jahat og Sisa og Je'us og Beria; dette var sønene hans Sime'i - fire i talet.

¹¹Jahat var hovdingen, og Sisa den andre. Men Je'us og Beria hadde ikkje mange søner; difor vart dei rekna for EI ættgrein, eitt yrkes-lag.

¹²Sønene hans Kahat var Amram, Jishar, Hebron og Ussiel - fire i talet.

¹³Sønene hans Amram var Aron og Moses. Aron vart utskild - han skulde helgast til å vera høgheilag, både han og sønene hans gjenom alle tider, so dei kunde brenna røykjelse for Herren og tena han og lysa velsigning i hans namn i all æva.

¹⁴Men sønene åt Moses, gudsmannen, vert rekna til Levi-ætti.

¹⁵Sønene hans Moses var Gersom og Elieser.

¹⁶Av Gersoms-sønene var Sebuel hovdingen.

¹⁷Av borni åt Elieser var Rehabja hovdingen. Elieser hadde ikkje fleire søner, men sønene hans Rehabja var ovleg mange.

¹⁸Av Jishars-sønene var Selomit hovdingen.

¹⁹Av Hebrons-sønene var Jerija hovdingen; Amarja var den andre, Jahasiel den tridje og Jekamam den fjorde.

²⁰Av Ussiels-sønene var Mika hovdingen, og Jissija den andre.

²¹Merari-sønene var Mahli og Musi. Sønene hans Mahli var Eleasar og Kis.

²²Då Eleasar døydde, var det ingi søner etter han, berre døtter; men frendane deira, sønene hans Kis, tok dei til konor.

²³Sønene hans Musi var Mahli og Eder og Jeremot - tri i talet.

²⁴Dette var Levi-sønene, etter ættgreinene sine, ættehovdingane som dei vart mynstra og talde med namn, mann for mann - dei som stelte med tenesta i Herrens hus, og var tjuge år gamle eller meir.

²⁵For David sa: Herren, Israels Gud, hev gjeve folket sitt ro og hev no bustaden sin i Jerusalem til æveleg tid.

²⁶Difor tarv ikkje heller levitane bera tabernaklet meir, eller noko av det som høyrer til tenesta der.

²⁷For det var etter dei siste fyresegnene frå David at Levi-borni vart talde frå tjugeårsalderen og uppetter.

²⁸Det yrket vart sette til, var å ganga Arons-sønene til handa med tenesta i Herrens hus. Dei skulde hava tilsyn med fyregardane og kovane og syta for at alt det heilage vart halde reint, og greida alt arbeid som fylgde med tenesta i Guds hus -

²⁹stella med skodebrødi og med finmjølet til matofferet og med dei usyrde tunnbrødleivane og med takkone og med det mjølet som skulde knodast, og med alle mål, både holmål og lengdemål.

³⁰Kvar morgon skulde dei standa og lova og prisa Herren, like eins kvar kveld.

³¹Dei skulde hjelpa til kvar gong det vart bore fram brennoffer for Herren på sabbatane og nymåne-dagane og høgtidene, so mange som fastsett var, etter dei fyresegnene dei hadde fenge - allstødt for Herrens åsyn.

³²Soleis skulde dei no gjera alt arbeidet som trongst ved møtetjeldet, og det som laut gjerast ved heilagdomen, og det som laut gjerast for Arons-sønene, brørne deira, i tenesta i Herrens hus.