Read nynorsk 1938 Andre Krønikebok 10 Bible Online

Andre Krønikebok 10 - nynorsk 1938 bible

Andre Krønikebok 10

¹Rehabeam for til Sikem; for heile Israels-lyden var komen til Sikem og skulde kåra han til konge.

²Då Jeroboam Nebatsson fekk spurt det - han var då i Egyptarland; han hadde rømt dit for kong Salomo - kom han heim att frå Egyptarland,

³og dei sende bod etter han. So kom Jeroboam og heile Israels-lyden og tala soleis til Rehabeam:

⁴Far din gav oss ei tung byrd å bera; men vil no du letta den harde tenesta og den tunge byrdi som far din la på oss, so skal me tena deg.

⁵Han svara: Gakk burt og bia tri dagar og kom so hit att til meg! So gjekk folket sin veg.

⁶Kong Rehabeam samrådde seg fyrst med dei gamle, som hadde gjort tenesta hjå Salomo, far hans, medan han levde, og spurde dei: Kva svar råder de meg til å gjeva dette folket?

⁷Dei svara han so: Syner du deg blid mot dette folket og er nådig mot dei og gjev dei gode ord, so kjem dei til å vera tenarane dine for all tid.

⁸Men han vyrde ikkje den rådi dei gamle gav han; han samrådde seg med dei unge, dei som hadde vakse upp saman med han og no gjorde tenesta hjå han,

⁹og spurde dei: Kva råder de oss til at me skal svara dette folket som kom og sa til meg: Du lyt letta den byrdi som far min la på oss?

¹⁰Og dei unge, som hadde vakse upp saman med han, svara: So skal du segja til dette folket som sa til deg: Far din gav oss ei tung byrd å bera; gjer no du henne lettare for oss - so skal du svara dei: Litlefingeren min er tjukkare enn mjødmane åt far min;

¹¹hev no far min lest ei tung byrd på dykk, so skal eg gjera henne tyngre; hev far min tukta dykk med svepor, so skal eg tukta dykk med skorpionar.

¹²Tridje dagen kom Jeroboam og heile lyden til Rehabeam, etter di kongen hadde sagt: Kom hit til meg att um tri dagar!

¹³Då gav kongen dei eit hardt svar - kong Rehabeam vyrde ikkje den rådi dei gamle hadde gjeve han,

¹⁴men svara dei so som dei unge hadde rådt han til: Hev far min lagt ei tung byrd åk på dykk, so skal eg gjera henne tyngre; hev far min tukta dykk med svepor, so skal eg tukta dykk med skorpionar.

¹⁵Kongen høyrde ikkje på folket; for Gud laga det so, av di han vilde Herrens ord skulde sannast, det som han hadde tala til Jeroboam Nebatsson gjenom Akia frå Silo.

¹⁶Då no heile Israel såg at kongen ikkje vilde høyra på dei, svara folket kongen so: Kva lut hev me i David? Me hev ingen lut i Isai-sonen. Heim att, Israel, kvar til si tjeldbu! Sjå no sjølv til huset ditt, David! So for alle heile Israel heim att.

¹⁷Berre yver dei Israels-borni som budde i Judabyane, vart Rehabeam konge.

¹⁸Kong Rehabeam sende Hadoram i veg, han som hadde tilsyn med arbeidsfolket; men Israels-borni steina han i hel, og kong Rehabeam sjølv laut stiga upp i vogni si det snøggaste han vann, og røma til Jerusalem.

¹⁹Soleis fall Israel frå Davids hus, og sidan hev det vore so til denne dag.