Read nynorsk 1938 Andre Krønikebok 12 Bible Online

Andre Krønikebok 12 - nynorsk 1938 bible

Andre Krønikebok 12

¹Men det gjekk so til at då Rehabeams kongedøme hadde fastna, og han sjølv var sterk vorten, vende han seg frå Herrens lov, og heile Israel med han.

²So hende det i femte styringsåret åt kong Rehabeam at Sisak, kongen i Egyptarland, gjorde ei herferd mot Jerusalem - for dei hadde svike Herren;

³han kom med tolv hundrad stridsvogner og seksti tusund hestfolk, og det fylgde han frå Egyptarland ei uteljande mengd hermenner: libyarar, sukkitar og etiopar.

⁴Han hertok dei faste byane i Judariket og kom alt til Jerusalem.

⁵Då kom Semaja, profeten, til Rehabeam og Juda-hovdingane, som hadde samla seg i Jerusalem av di dei var redde Sisak, og han sa til dei: So segjer Herren: De hev vendt dykk frå meg; difor hev eg og vendt meg frå dykk og gjeve dykk i Sisaks vald.

⁶Då gjorde dei seg mjuke, både Israels hovdingar og kongen, og sa: Herren er rettferdig.

⁷Og då Herren såg at dei hadde gjort seg mjuke, kom Herrens ord åt Semaja, og det lydde so: Dei hev gjort seg mjuke; og eg vil ikkje tyna dei; men laga det so at dei so vidt vert berga, og vreiden min skal ikkje ausast ut yver Jerusalem ved Sisak.

⁸Men dei skal verta tenarane hans, so dei fær kjenna kor stor skilnad det er på å tena meg og å tena kongane i heidninglandi.

⁹So drog Sisak, egyptarkongen, upp mot Jerusalem. Han både dei skattane som var i Herrens hus, og dei som var i kongshuset - alt saman tok han. Like eins tok han gullskjoldane som Salomo hadde kosta.

¹⁰I staden for dei let kong Rehabeam gjera koparskjoldar og sette hovdingane for drabantane som heldt vakt i slottsporten, til å taka vare på dei.

¹¹Og kvar gong kongen gjekk inn i Herrens hus, kom drabantane og bar dei og tok dei so med seg attende til vaktstova.

¹²Det var av di Rehabeam gjorde seg mjuk, at Herrens snudde seg ifrå han; han vilde ikkje heiltupp tyna han, og det fanst endå noko godt i Judariket.

¹³Sidan sat kong Rehabeam atter trygg i Jerusalem og styrde riket sitt. For han var ein og fyrti år gamal då han vart konge, og syttan år styrde han i Jerusalem, den byen Herren hadde valt ut i alle Israelsfylki og gjort til bustad for namnet sitt. Mor hans heitte Na'ama og var frå Ammon.

¹⁴Han gjorde det som vondt var; for han la ikkje hugen sin på å søkja Herren.

¹⁵Alt det som er å fortelja um Rehabeam, både i hans fyrste og i hans seinare tid, det stend skrive i krønikebøkene åt profeten Semaja og sjåaren Iddo, der som ættetavlene er uppskrivne. Millom Rehabeam og Jeroboam var det ufred heile tidi.

¹⁶So for Rehabeam til og vart gravlagd i Davidsstaden, og Abia, son hans, vart konge etter han.