Read nynorsk 1938 Andre Krønikebok 14 Bible Online

Andre Krønikebok 14 - nynorsk 1938 bible

Andre Krønikebok 14

¹So for Abia til federne sine og vart gravlagd i Davidsstaden. Asa, son hans, vart konge etter han. I hans dagar hadde landet fred i ti år.

²Asa gjorde det som var godt og rett i augo åt Herren hans Gud.

³Han fekk burt dei framande altari og offerhaugane og braut sund minnesteinane og hogg sund Astarte-bileti.

⁴Han sa til Juda-folket at dei skulde søkja Herren, sin fedre-Gud, og halda lovi og bodi.

⁵I alle Judabyane fekk han burt offerhaugane og solsulone, og riket hadde ro so lenge han styrde.

⁶Han bygde borgar i Judariket. For landet hadde fred; det var ingen som baud til å taka på han i dei åri; for Herren laga det so at han fekk ro.

⁷Han sa til Juda-mennene: Lat oss byggja desse byane og reisa murar og tårn kring dei, med portar og bommar! Enno råder me fritt yver landet, for di me hev søkt Herren vår Gud; me hev søkt han, og han hev late oss få ro på alle kantar. So tok dei til å byggja, og alt gjekk vel for dei.

⁸Heren hans Asa var tri hundrad tusund mann av Juda-ætti, væpna med spjot og store skjoldar, og tvo hundrad og åtti tusund av Benjamins-ætti, som bar små skjoldar og skaut med boge; dei var alle djerve stridsmenner.

⁹Ein gong drog Serah, etiopen, ut imot dei med ein her på tusund gonger tusund mann og tri hundrad stridsvogner. Då han var komen so langt som til Maresa,

¹⁰drog Asa ut imot han, og dei fylka seg til strid i Sefatadalen ved Maresa.

¹¹Og Asa ropa til Herren sin Gud og sa: Herre, for deg gjer det ingen skilnad um han er mektig eller maktlaus den du vil hjelpa. Hjelp oss, Herre, vår Gud! For deg set me lit til, og i ditt namn hev me gjenge mot denne store hopen. Herre, du er vår Gud; lat det ikkje henda at eit menneske stend seg mot deg!

¹²Då laga Herren det so at etiopane tapte for Asa og Juda-heren og rømde.

¹³Asa og folket som var med han, elte dei alt til Gerar, og det fall so mange av etiopane at ingen av dei kom undan med livet; dei vart knustra der Herren og hans her for fram. Juda-mennene tok med seg uhorveleg mykje herfang;

¹⁴dei hertok alle byane rundt ikring Gerar - for ein otte for Herren var komen yver dei - og rana alt som var i dei; for det fanst mykje å rana der.

¹⁵Dei hertok jamvel buskapstjeldi og dreiv burt ei mengd med småfe og kamelar og for so heim att til Jerusalem.