Read nynorsk 1938 Andre Krønikebok 17 Bible Online

Andre Krønikebok 17 - nynorsk 1938 bible

Andre Krønikebok 17

¹Josafat, son hans, vart konge etter han. Han freista å styrkja makti si mot Israel

²og la herfolk i alle dei faste byane i Judariket og sette ut vaktpostar både i Judalandet og i dei byane i Efra'im som Asa, far hans, hadde vunne.

³Herren var med Josafat, for di han ferdast etter dei vegane som David, ættefaren hans, hadde fylgt i si fyrste tid, og ikkje søkte til Ba'alane,

⁴men søkte til Gud åt far sin og heldt seg etter bodi hans og ikkje for åt som dei gjorde i Israelsriket.

⁵Difor trygde Herren kongedømet i hans hand, og heile Juda-folket kom med gåvor til Josafat, so han fekk stor rikdom og æra.

⁶Og medan han heldt fram etter Herrens vegar, auka modet hans, so han endå fekk burt offerhaugane og Astarte-bileti i Juda.

⁷I det tridje året av kongedømet sitt sende han nokre av hovdingane sine av stad til å læra folket i Judabyane; det var Benha'il og Obadja og Sakarja og Netanel og Mikaja

⁸og saman med dei desse levitane: Semaja og Netanja og Sebadja og Asael og Semiramot og Jonatan og Adonja og Tobia og Tob-Adonja og med dei prestane Elisama og Joram.

⁹Dei lærde no i Judalandet og hadde Herrens lovbok med seg; dei for ikring i alle Judabyane og lærde folket.

¹⁰Då kom det otte frå Herren yver alle riki i dei landi som låg rundt ikring Juda, so dei ikkje torde yppa strid med Josafat.

¹¹Nokre av filistarane kom åt Josafat med gåvor og med sylv som dei gav i skatt; arabarane og kom til han og hadde med seg småfe, sju tusund og sju hundrad verar og sju tusund sju hundrad bukkar.

¹²Soleis auka Josafats velde stødt, og han bygde borger og upplagsbyar i Judalandet.

¹³Han hadde mykje gods liggjande i Judabyane og stridsdjerve herfolk i Jerusalem.

¹⁴Dei skal me no rekna upp etter ættgreinene deira: Av Juda-ætti var desse hovdingar yver tusund mann: herhovdingen Adna med tri hundrad tusund djerve stridsmenner

¹⁵og jamsides han herhovdingen Johanan med tvo hundrad og åtti tusund

¹⁶og jamsides han Amasja Sikrison, som av si eigi råd hadde bode seg fram til Herrens tenesta; med han var tvo hundrad tusund djerve stridsmenner.

¹⁷Av Benjamins-ætti var det Eljada, ei djerv kjempa, med tvo hundrad tusund mann som var væpna med boge og skjold,

¹⁸og jamsides han Josabad med hundrad og åtti tusund herbudde menner.

¹⁹Dette var dei som gjekk kongen til handa, umfram det herfolket som kongen hadde lagt i dei faste byane i heile Judariket.