Read nynorsk 1938 Andre Krønikebok 26 Bible Online

Andre Krønikebok 26 - nynorsk 1938 bible

Andre Krønikebok 26

¹So tok heile Juda-folket og gjorde Ussias, som då var sekstan år gamal, til konge etter Amasja, far hans.

²Han vann Elot att åt Judariket og bygde byen um til ei borg, etter kongen var faren til federne sine.

³Ussia var sekstan år gamal då han tok styret, og sat tvo og femti år konge i Jerusalem. Mor hans heitte Jekilja og var frå Jerusalem.

⁴Han gjorde det som rett var i Herrens augo, heiltupp soleis som Amasja, far hans, hadde gjort.

⁵Han heldt ved og søkte Gud so lenge Sakarja levde, han som skyna seg på Guds syner; og so lenge han søkte Herren, let Gud allting lukkast for han.

⁶Han drog i herferd mot filistarane og reiv ned bymurane i Gat og Jabne og Asdod; sidan bygde han byar i Asdodbygdi og andre stader i Filistarlandet.

⁷Gud hjelpte han mot filistarane og mot dei arabarane som budde i Gur-Ba'al og mot me'unitane.

⁸Ammonitane kom med gåvor til Ussias, og namnet hans nådde alt burtåt Egyptarland; for han vann ovende stort velde.

⁹Ussia bygde tårn i Jerusalem, både ved Hyrneporten og ved Dalporten og ved Vinkelen og gjorde soleis desse stadene faste og sterke. /[19]

¹⁰I øydemarki og bygde han tårn og hogg ut mange brunnar; for han hadde mykje bufe både i låglandet og på høgsletta, og han heldt mykje arbeidsfolk som dyrka åkrane eller vyrdsla vintrei på fjelli og i hagane; for jordbruket åtte hugen hans.

¹¹Ussia hadde ein stridsbudd her, som drog i herferd i flokkar, og som Je'uel, riksskrivaren, og Ma'aseja, tilsynsmannen, hadde mynstra og talt under tilsyn av Hananja, ein av hovdingane åt kongen.

¹²Dei herkjempone som var ættehovdingar, var i alt tvo tusund og seks hundrad i talet.

¹³Under dei stod det ei hermakt på tri hundrad og sju tusund og fem hundrad mann, som gjekk i striden med hug og dug og hjelpte kongen mot fienden.

¹⁴Heile denne heren budde Ussias ut med skjoldar og spjot og hjelmar og brynjor og bogar og slyngjesteinar.

¹⁵I Jerusalem let han laga kunstig uttenkte krigsmaskinor, som skulde standa på tårni og murhyrno og skjota ut piler og store steinar. Og namnet hans nådde vida ikring; for han fekk underfull hjelp, so makti hans vart stor.

¹⁶Men då han hadde fenge slik makt, vart hjarta hans so fullt av ovmod at han forsynda seg; han var ulydig mot Herren sin Gud og gjekk inn i Herrens heilagdom, vilde brenna røykjelse på røykofferaltaret.

¹⁷Men Asarja, presten, gjekk inn etter han og hadde med seg åtti av Herrens prestar, uredde menner.

¹⁸Dei steig fram imot kong Ussias og sa til han: Du hev ikkje lov til å brenna røykjelse for Herren, Ussias; det hev berre prestane, Arons-sønene, dei som er vigde til det. Gakk ut or heilagdomen! For du hev vore ulydig, og det vert ikkje til æra for deg hjå Herren din Gud.

¹⁹Då vart Ussia vreid. Han stod alt med ei røykjelsesskål i handi og skulde til å brenna røykjelse; men i det same han slepte vreiden laus mot prestane, braut spillsykja ut på panna hans, som han stod der framfor prestane i Herrens hus, innmed røykofferaltaret.

²⁰Og då Asarja, øvstepresten, og alle hine prestane snudde seg mot han, såg dei at han var spillsjuk på panna. Då dreiv dei han burt med ein gong, og sjølv skunda han seg og å koma ut, av di Herren hadde råma han so hardt.

²¹Sidan var Ussias spillsjuk alt til sin døyande dag. Han budde i eit hus for seg sjølv som andre spillsjuke; for han var utestengd frå Herrens hus. Jotam, son hans, stod fyre huset åt kongen og styrde landslyden.

²²Det som elles er å segja um Ussia, både i hans fyrste og i hans seinare tid, det hev Esaias Amosson, profeten skrive upp. /[20]

²³So for Ussias til federne sine, og dei gravla han hjå federne hans på den gravmarki som høyrde kongane til; for dei sa: Han er spillsjuk. Jotam, son hans, vart konge etter han.