Read nynorsk 1938 Andre Krønikebok 4 Bible Online

Andre Krønikebok 4 - nynorsk 1938 bible

Andre Krønikebok 4

¹So gjorde han eit altar av kopar; det var tjuge alner langt, tjuge alner breidt og ti alner høgt.

²Sidan laga han det støypte havet; det heldt ti alner frå bard til bard og var heiltupp rundt og fem alner djupt; ei snor på tretti alner nådde ikring det.

³Eit stykke nedpå det var det bilete av uksar rundt ikring; dei gjekk rundt heile havet, ti for kvar aln. Tvo rader med uksar var det på havet, og dei var samstøypte med det.

⁴Det stod på tolv uksar; tri snudde mot nord, tri mot vest, tri mot sud og tri mot aust. Havet kvilde på dei, og alle vende dei bakluten innetter.

⁵Kjeret var ei handbreidd tjukt, og barden på det var laga som barden på eit staup eller som ein liljeblom. Det var romsamt, dette kjeret - det tok tri tusund bat.

⁶So gjorde han ti tvåttebaljor og sette fem av dei på høgre sida og fem på vinstre; i dei skylde dei det som høyrde til brennofferi; men havet hadde prestane til å vaska seg i.

⁷So gjorde han gull-ljosestakane, ti i talet, etter den gjerdi som skulde vera på dei, og sette dei i det heilage romet, fem på høgre sida og fem på vinstre.

⁸So gjorde han ti bord og sette i det heilage romet, fem på høgre sida og fem på vinstre. So gjorde han hundrad gullskåler.

⁹So laga han prestefyregarden og den store tempelgarden og dører til tempelgarden, og dørene klædde han med kopar.

¹⁰Havet sette han på høgre sida av huset, mot sudaust.

¹¹So gjorde Huram oskefati og eldskuflene og blodbollane. No hadde Huram fullført det arbeidet han laut gjera for kong Salomo i Guds hus. Det var:

¹²tvo sulor med dei tvo kvelvde skålene og sulehovudi på toppen av sulone og dei tvo neti som skulde hylja dei tvo skålene på sulehovudi,

¹³og dei fire hundrad granatepli til dei tvo neti me hev nemnt - tvo rader med granateple til kvart net -;

¹⁴han gjorde og fotstykki med baljone på

¹⁵og havet med dei tolv uksane under;

¹⁶og oskefati og eldskuflene og steikjespiti og alt det som høyrde til, gjorde Huram, meisteren som kong Salomo hadde i si tenesta, for han til Herrens hus; det var av blank kopar.

¹⁷Det var på Jordansletta kongen fekk dei støypte, i leirgrunnen millom Sukkot og Seredata.

¹⁸Salomo let gjera ei ovmengd med slike ting; for det vart ikkje røkt etter kor mykje koparen vog.

¹⁹Salomo gjorde og alle dei ting som skulde vera i Herrens hus: gullaltaret og bordi som skodebrødi skulde liggja på;

²⁰og ljosestakane med lampone sine, som skulde kveikjast på fyreskrivi vis, framanfor koret - dei var av fint gull -

²¹og blomane på dei og lampone og ljosesaksene - dei og var av gull, av det finaste gull som finst -

²²og knivane og blodbollane og røykjelsesskålane og glodpannone, alt av fint gull. Og i inngangane til huset var både dei indre dørene som førde til det høgheilage romet, og dei dørene som førde til det heilage romet, av gull.