Read nynorsk 1938 Andre Krønikebok 9 Bible Online

Andre Krønikebok 9 - nynorsk 1938 bible

Andre Krønikebok 9

¹Då dronningi i Saba fekk høyra gjetordet um Salomo, kom ho til Jerusalem og vilde røyna han med gåtor. Ho kom med eit drusteleg fylgje, og førde med seg på kamelar kryddor og ei ovmengd med gull og dyre steinar. Då ho hadde stige inn hjå Salomo, tala ho med han um alt som låg henne på hjarta.

²Og Salomo tydde alle gåtone hennar; det var ikkje eit einaste ord av det ho sa, som var dult for Salomo, so han ikkje kunde tyda det.

³Då Saba-dronningi vart var visdomen åt Salomo og såg huset han hadde bygt,

⁴og rettene på bordet hans, og hirdmennene hans der dei sat, bordsveinane som stod kringum, og klædnaden deira, og skjenkjarsveinane og klædnaden deira, og den troppi han gjekk upp etter til Herrens hus, vart ho reint frå seg av undring

⁵og sa til kongen: So var det då sant det eg høyrde heime i landet mitt um deg og visdomen din!

⁶Eg vilde ikkje tru det dei fortalde, fyrr eg kom og fekk sjå det med eigne augo; men no ser eg at dei ikkje hev fortalt meg det halve um visdomen din; du er endå større enn det gjetordet eg hev høyrt.

⁷Sæle er mennene dine, sæle er desse tenarane dine, som allstødt fær standa framfyre deg og høyra visdomen din!

⁸Lova vere Herren din Gud, som hadde slik hugnad i deg at han sette deg på sin kongsstol til å vera konge for Herren din Gud! Det er av di din Gud hev Israel kjært og vil halda det uppe i all æva, at han sette deg til konge yver dei, so du skulde fremja rett og rettferd.

⁹So gav ho kongen hundrad og tjuge talentar gull og ei stor mengd med kryddor og dyre steinar; det hev aldri funnest slik ei mengd kryddor i landet som det Saba-dronningi gav kong Salomo.

¹⁰Elles hadde no og folki åt Huram og folki åt Salomo, dei som henta gull frå Ofir, både sandeltre og dyre steinar med seg derifrå.

¹¹Av sandeltreet let kongen gjera tropper til Herrens hus og til kongshuset og citarar og harpor til songarane. Noko slikt hadde aldri vore set i Judalandet fyrr.

¹²Kong Salomo gav Saba-dronningi alt ho hadde hug på og bad um, umfram det ho fekk i lika for det ho hadde havt med til kongen. So tok ho av stad og for heim att til landet sitt med fylgjesveinane sine.

¹³Det gullet som Salomo fekk inn på eitt år, vog seks hundrad og seks og seksti talent;

¹⁴då var det ikkje medrekna det som kjøpmennene og kræmarane kom med; alle kongane i Arabia og alle landshovdingane kom og med gull og sylv til Salomo.

¹⁵Kong Salomo let gjera tvo hundrad store skjoldar av hamra gull - det gjekk seks hundrad sekel gull med til kvart skjold -

¹⁶og tri hundrad små skjoldar, som og var av hamra gull; til kvart av dei gjekk det med tri hundrad sekel gull. Alle desse skjoldane sette kongen i Libanonskoghuset.

¹⁷Kongen let og gjera ein stor kongsstol av filsbein og klædde han med skirt gull.

¹⁸Kongsstolen hadde seks troppesteg og ein fotskammel av gull, som var fastgjord til kongsstolen. På båe sidor av sætet var det stolarmar, og innmed stolarmane stod tvo løvor.

¹⁹På dei seks troppestegi stod det og løvor på båe sidone, tolv i talet. Maken til kongsstol hev aldri vore gjord i noko anna kongerike.

²⁰Alle drykkjestaupi åt kong Salomo var av gull, og alle husgognene i Libanonskoghuset var og av fint gull. Sylv var ikkje rekna for noko i Salomos dagar.

²¹For kongen hadde skip som for til Tarsis saman med folki hans Huram; ein gong tridje kvart år kom Tarsis-skipi heim, ladde med gull og sylv og filsbein og apor og påfuglar.

²²Kong Salomo gjekk framum alle andre kongar på jordi i rikdom og visdom.

²³Frå alle verdsens kantar kom det kongar og vilde sjå han og høyra visdomen som Gud hadde lagt i hjarta hans.

²⁴Og alle hadde dei gåvor med; sylv og gull og klædebunader, våpen og kryddor, hestar og muldyr; so gjorde dei år etter år.

²⁵Salomo hadde fire tusund stallrom for hestar og stridsvogner og tolv tusund hestfolk; av dei la han sume i vognbyane, og sume hadde han hjå seg sjølv i Jerusalem.

²⁶Han rådde yver alle kongane frå elvi til Filistarlandet og alt til bytet med Egyptarland.

²⁷Kongen gjorde sylvet likso vanleg i Jerusalem som stein, og sedertre like vanleg som morbærtrei i låglandet.

²⁸Frå Egyptarland og alle andre land førde dei hestar til Salomo.

²⁹Det som meir er å segja um Salomo, både i hans fyrste og i hans seinare dagar, det stend skrive i krønikeboki åt Natan, profeten, og i spådomsboki åt Akia frå Silo og i syni åt Jedi, sjåaren, um Jeroboam Nebatsson.

³⁰Salomo sat konge i Jerusalem og rådde yver heile Israel i fyrti år.

³¹So for han til federne sine og vart gravlagd i byen åt David, far sin; og Rehabeam, son hans, vart konge etter han.