Read nynorsk 1938 Ester 6 Bible Online

Ester 6 - nynorsk 1938 bible

Ester 6

¹Den natti fekk ikkje kongen sova. Han bad dei henta krønikeboki, som dei minneverdige hendingane var uppskrivne i, og ho vart upplesi for kongen.

²Der fann dei det skrive korleis Mordekai hadde meldt at Bigtana og Teres, tvo av dei hirdmennene som vakta dørstokken i kongsgarden, hadde freista å leggja hand på kong Ahasverus.

³Då spurde kongen: Kva æra og vyrdnad hev Mordekai fenge for det? Sveinane åt kongen, dei som gjekk han til handa, svara: Han hev ikkje fenge nokon ting.

⁴So sa kongen: Kven er det som er ute i tunet? Haman var då nyst komen inn i ytre tunet åt kongsgarden, vilde beda kongen at Mordekai måtte verta upphengd i den galgen han hadde reist åt han.

⁵Kongssveinane svara: Det er Haman som stend der ute i tunet. Kongen sa: Lat han koma inn!

⁶Då no Haman kom inn, spurde kongen han: Kva skal ein gjera med den mannen som kongen hev hug til å æra? Då tenkte Haman med seg: Kven skulde kongen heller vilja visa æra enn meg?

⁷Og han sa til kongen: Er det ein mann som kongen hev hug til å æra,

⁸so lat dei henta ein kongeleg klædnad som kongen sjølv hev bore, og ein hest som kongen sjølv hev ride på, og som hev ein kongeleg kruna på hovudet;

⁹ein av dei øvste hovdingane åt kongen skal taka imot klædnaden og hesten, og han skal hava klædnaden på den mannen som kongen hev hug til å æra, og lata han rida på hesten igjenom gatone i byen og ropa fyre han: Soleis gjer ein med den mannen som kongen hev hug til å æra!

¹⁰Då sa kongen til Haman: Skunda deg, tak klædnaden og hesten, som du hev sagt, og gjer soleis med jøden Mordekai, som sit i kongsporten! Gløym ikkje noko av alt det du hev sagt!

¹¹So tok Haman klædnaden og hesten, hadde klædnaden på Mordekai, let han rida gjenom gatone i byen og ropa fyre han: Soleis gjer ein med den mannen som kongen hev hug til å æra!

¹²Mordekai gjekk attende til kongsporten; men Haman skunda seg heim, sorgfull og med hovudet innsveipt.

¹³Han fortalde Seres, kona si, og alle venene sine alt det som hadde hendt han. Då sa dei til han, både vismennene hans og Seres, kona hans: Dersom Mordekai, som du hev teke til å tapa for, er av jødeætt, so maktast du ingen ting mot han, men kjem til å tapa reint for han.

¹⁴Medan dei endå heldt på og tala med han, kom hirdmennene åt kongen - dei skulde skunda seg og henta Haman til gjestebodet som Ester hadde stelt til.