Read nynorsk 1938 Andre Mosebok 19 Bible Online

Andre Mosebok 19 - nynorsk 1938 bible

Andre Mosebok 19

¹Trimånadsdagen etter Israels-borni hadde fare frå Egyptarland, kom dei til Sinaiøydemarki.

²Dei tok ut frå Refidim og kom til Sinaiøydemarki, og der lægra Israel seg i villmarki midt for fjellet.

³So steig Moses upp til Gud, og Herren ropa til han frå fjellet og sa: Dette skal du segja til Jakobs-ætti og gjera kunnigt for Israels-borni:

⁴De hev set kva eg gjorde med egyptarane, og korleis eg lyfte dykk på ørnevenger og bar dykk hit til meg.

⁵Vil de no lyda vel etter ordi mine og halda pakti mi, so skal de vera min eigedom framum alle andre folk; for heile jordi er mi.

⁶Og de skal vera meg eit kongerike av prestar og eit heilagt folk. Desse ordi skal du tala til Israels-borni.

⁷Då Moses kom att, kalla han i hop dei øvste av folket og bar fram det bodet som Herren hadde sendt han med.

⁸Då svara folket alle som ein: Alt det Herren hev sagt, skal me gjera. Og Moses bar svaret deira attende til Herren.

⁹Då sa Herren til Moses: Høyr her! Eg skal koma til deg i ei tett sky, so folket kann høyra når eg talar med deg; då skal dei alltid tru på deg. Då Moses hadde sagt Herren kva folket svara,

¹⁰so sa Herren til han: Gakk til folket og seg dei skal helga seg idag og i morgen og två klædi sine.

¹¹Tridje dagen skal dei halda seg reiduge; for då vil Herren stiga ned på Sinaifjellet for augo åt alt folket.

¹²Og du skal setja ei stengsla for folket rundt ikring og segja: Vara dykk og gakk ikkje upp på fjellet, og kom ikkje innåt det! Kvar den som kjem innåt fjellet, skal døy.

¹³Ingen må taka si hand i han! Han skal steinast eller skjotast; anten det er dyr eller folk, so skal dei lata livet. Men når hornet ljomar med lange tonar, då skal dei stiga upp på fjellet.

¹⁴So gjekk Moses ned av fjellet til folket og sa dei skulde helga seg og två klædi sine.

¹⁵Og han sa til dei: Tridje dagen lyt de halda dykk reiduge! Kom ikkje nær kvinnor!

¹⁶So var det tridje dagen med same det ljosna, då bar det laust med toreslått og ljon; på fjellet låg ei tjukk sky, og dei høyrde ein ovsterk lurljod. Då skalv alt folket som i lægret var.

¹⁷Men Moses førde folket ut or lægret til møtes med Gud, og dei vart standane innunder fjellet.

¹⁸Og heile Sinaifjellet stod i ein røyk, av di at Herren for ned på det i eld; røyken steig upp som av ein masomn, og heile fjellet dirra og skalv.

¹⁹Og ljurljoden auka og vart sterkare og sterkare; Moses tala, og Gud svara han lydt.

²⁰Då Herren hadde stige ned på Sinaifjellet, på øvste tinden, so kalla han Moses upp på nuten til seg. Då gjekk Moses upp,

²¹og Herren sa til han: Gakk ned og vara folket, so dei ikkje bryt seg fram til Herren og vil sjå han; for då kjem mange av dei til å stupa.

²²Og prestane, som kjem nærmare innåt Herren, lyt og helga seg, so Herren ikkje skal fara inn imillom dei.

²³Då sa Moses til Herren: Folket kann ikkje koma upp på Sinaifjellet. For du hev sjølv vara oss og sagt: Set eit gjerde kring fjellet og lys det heilagt!

²⁴Og Herren sa til han: Gakk no berre ned og kom so upp att, både du og Aron! Men prestane og ålmugen må ikkje brjota seg fram og stiga upp til Herren; for då kjem han til å fara inn imillom dei.

²⁵So gjekk Moses ned til folket og sa det til dei.