Read nynorsk 1938 Andre Mosebok 25 Bible Online

Andre Mosebok 25 - nynorsk 1938 bible

Andre Mosebok 25

¹Og Herren tala til Moses og sa:

²Seg til Israels-borni at dei skal koma med ei reida til meg! Kvar skal gjeva etter som han hev hjartelag til, og det dei gjev meg, skal de taka imot.

³Og reida som de skal taka imot av dei, det lyt vara gull og sylv og kopar

⁴og blå og purpurraud og karmosinraud ull og fint lin og geiteragg

⁵og raudleta verskinn og takasskinn og akasietre, /[21]

⁶olje til ljosestaken, kryddor til salvingsoljen og den angande røykjelsen,

⁷onykssteinar og andre dyre steinar til å setja på messehakelen og bringeduken. /

⁸Og dei skal gjera meg ein heilagdom, so vil eg bu imillom dei.

⁹Både tabernaklet og alt som til det høyrer, skal de i alle måtar gjera etter det biletet eg vil syna deg.

¹⁰Dei skal gjera ei kiste av akasietre, halvtridje aln lang, halvonnor aln breid og halvonnor aln høg.

¹¹Den skal du klæda med skirt gull, både innan og utan skal du gullklæda henne, og gjera ein gullkrans på henne rundt ikring.

¹²Du skal støypa fire gullringar og festa dei i dei fire føtene på kista, tvo på den eine sida og tvo på den andre.

¹³So skal du gjera stenger av akasietre og klæda dei med gull

¹⁴og smøygja dei inn i ringane på sidone av kista; dei skal vera til å bera henne etter.

¹⁵Stengene skal allstødt sitja i ringane på kista; dei må aldri takast utor.

¹⁶I den kista skal du leggja vitnemålet som eg vil gjeva deg. /[22]

¹⁷So skal du gjera ein nådestol av skirt gull, halvtridje aln lang og halvonnor aln breid. /[23]

¹⁸På båe endane av nådestolen skal vera tvo kjerubar; dei skal du gjera av drive gull.

¹⁹Den eine kjeruben skal vera ytst på den eine enden og den andre ytst på hin enden; i eitt med nådestolen skal de gjera kjerubane, ein på kvar ende.

²⁰Kjerubane skal halda vengene utbreidde og upplyfte, so dei tekkjer yver nådestolen med vengene sine, og andleti deira skal snu imot einannan; dei skal vende augo mot nådestolen.

²¹So skal du setja nådestolen ovanpå kista, og inni kista skal du leggja vitnemålet som eg vil gjeva deg. /[24]

²²Og sidan vil eg møtast med deg der; frå romet yver nådestolen millom båe kjerubane som er på vitnemålskista, vil eg tala med deg kvar gong eg sender deg bod med Israels-borni.

²³So skal du gjera eit bord av akasietre, tvo alner langt og ei aln breidt og halvonnor aln høgt.

²⁴Du skal klæda det med skirt gull og gjera ein gullkrans på det rundt ikring.

²⁵Rundt um det skal du gjera ei list so breid som ei hand, og på listi skal du setja ein gullkrans som gjeng heilt ikring.

²⁶So skal du gjera fire gullringar, og dei skal du setja i dei fire hyrno på dei fire bordføtene.

²⁷Tett uppmed listi skal ringane sitja; dei skal vera til å smøygja berestenger inn i.

²⁸Stengene skal du gjera av akasietre og klæda dei med gull; dei er det bordet skal berast i.

²⁹Sidan skal du gjera dei fati og skålene som høyrer til bordet, og kannone og bollane som de skal skjenkja drykkoffer av; alt dette skal du gjera av skirt gull.

³⁰På bordet skal du allstødt leggja skodebrød for mi åsyn.

³¹So skal du gjera ein ljosestake av skirt gull; drive arbeid skal det vera både hoven og leggen. På staken skal det vera blomar, knuppar og utsprotne blad, og dei skal vera samgjorde med han.

³²Seks armar skal greina seg ut ifrå han, tri på den eine sida og tri på den andre.

³³På den eine armen skal det vera tri utsprotne mandelblomar med knupp og blad, og soleis på alle dei seks armane som greinar seg ut ifrå ljosestaken.

³⁴På sjølve staken skal det vera fire utsprotne mandelblomar med knupp og blad:

³⁵ein blomsterknupp under dei fyrste tvo armane, og ein under dei næste tvo armane, og ein under dei øvste tvo armane - ein knupp under kvart par av dei seks armane som greinar seg ut ifrå ljosestaken.

³⁶Både blomsterknuppane og armane skal vera samsmidde med staken, alt skal vera eitt heilgjort arbeid av drive skirt gull.

³⁷So skal du gjera lampone til ljosestaken, sju i talet, og dei skal setjast upp so ljoset fell frametter, på romet framanfor staken.

³⁸Saksene og saksplatone som høyrer til, skal vera av skirt gull.

³⁹Ein talent skirt gull skal de bruka til ljosestaken og alle desse gognene. /[25]

⁴⁰Sjå no til at du fær gjort dette etter det biletet som vart synt deg på fjellet!