Read nynorsk 1938 Andre Mosebok 3 Bible Online

Andre Mosebok 3 - nynorsk 1938 bible

Andre Mosebok 3

¹Moses gjette no småfeet åt Jetro, verfar sin, presten i Midian. So var det ein gong han dreiv småfeet burt um øyde, arki og kom til Gudsfjellet, til Horeb. /[4]

²Der synte Herrens engel seg for han i ein eldsloge, som slo beint upp or ein klungerrunne; han såg at runnen stod i ljos loge, men klungeren brann ikkje upp.

³Då sa Moses: Eg vil ganga innåt og sjå dette store underet; kvifor klungeren ikkje brenn upp.

⁴Då Herren såg at han gjekk innåt og vilde sjå, so ropa Gud til han utor klungerrunnen: Moses, Moses. Og han svara: Ja, her er eg.

⁵Då sa han: Kom ikkje næmare! Hav av deg skorne! For staden du stend på, er heilag jord.

⁶Og han sa: Eg er far din's Gud, Abrahams Gud og Isaks Gud og Jakobs Gud. Då løynde Moses andletet sitt, for han torde ikkje sjå på Gud.

⁷Og Herren sa: Eg hev set kor vondt folket mitt hev det i Egyptarland, og høyrt klageropi deira yver futane; eg veit kva dei lid.

⁸Og no hev eg stiga ned og vil fria dei ut frå egyptarane og føra dei upp frå dette landet til eit godt og vidt land, til eit land som fløymer med mjølk og honning, der som kana'anitane er og hetitane og amoritane og ferisitane og hevitane og jebusitane.

⁹For no hev naudropet frå Israels-borni nått upp til meg, og eg hev og set korleis egyptarane trugar og plagar dei.

¹⁰Gakk no du til Farao med bod frå meg, og før folket mitt, Israels-borni, ut or Egyptarland!

¹¹Då sa Moses til Gud: Er eg den mann at eg kann ganga til Farao, og kann eg føra Israels-borni ut or Egyptarland?

¹²Og han sa: Ja, for eg skal vera med deg! Og det skal du hava til merke på at det er eg som hev sendt deg: Når du hev ført folket ut or Egyptarland, so skal de halda gudstenesta på dette fjellet.

¹³Då sa Moses til Gud: Men når eg no kjem til Israels-borni og segjer til dei: Gud åt federne dykkar hev sendt meg til dykk, og dei so spør: Kva er namnet hans? - kva skal eg då svara dei?

¹⁴Og Gud sa til Moses: EG ER DEN EG ER! So skal du svara Israels-borni, sa han: Han som heiter Eg er, hev sendt meg til dykk.

¹⁵Og endå sa Gud det til Moses: So skal du segja til Israels-borni: Herren, Gud åt federne dykkar, Abrahams Gud og Isaks Gud og Jakobs Gud, hev sendt meg til dykk. Det skal vera namnet mitt i all æva, og so skal dei kalla meg ætt etter ætt. /[5]

¹⁶Gakk no du og samla i hop dei øvste i Israel og seg til dei: Herren, Gud åt federne dykkar, Abrahams Gud og Isaks Gud og Jakobs Gud, hev synt seg for meg og sagt: Eg hev havt auga med dykk og veit korleis dei fer åt med dykk i Egyptarland.

¹⁷Og eg sa: Eg vil fria dykk ut or alt det vonde de lid i Egyptarland, og føra dykk til landet åt kana'anitane og hetitane og amoritane og ferisitane og hevitane og jebusitane, eit land som fløymer med mjølk og honning.

¹⁸Eg dei skal gjeva gaum etter ordi dine, og so skal du ganga fram for kongen i Egyptarland, du og dei øvste i Israel, og de skal segja til han: Herren hebrearguden, hev møtt oss! Gode, gjev oss lov til å fara tri dagsleider ut i øydemarki og ofra til Herren vår Gud!

¹⁹Men eg veit at kongen i Egyptarland ikkje gjev dykk lov til å fara, ikkje um han so fær kjenna ei sterk hand yver seg.

²⁰So vil eg då lyfta handi mi og slå Egyptarland med alle underi mine, som eg vil gjera midt imillom dei, og då skal han sleppa dykk.

²¹Og eg vil gjera det so at egyptarane fær godvilje for dette folket, so de ikkje skal fara tomhendt når de fer;

²²men kvar kona skal beda grannekona si eller den ho bur i hus med, um sylv og gull og helgeklæde, og det skal de lata sønene og døtterne dykkar hava på seg; det skal vera herfanget de tek av egyptarane.