Read nynorsk 1938 Andre Mosebok 31 Bible Online

Andre Mosebok 31 - nynorsk 1938 bible

Andre Mosebok 31

¹Og Herren tala til Moses og sa:

²Sjå no hev eg kåra og kalla Besalel, son åt Uri Hursson, av Juda-ætti

³og fyllt han med Guds ande, med visdom og vit og kunnskap og godt lag til alt handverk,

⁴so han kann tenkja ut kunstverk og smida dei ut både i gull og i sylv og i kopar,

⁵og ferda til glimesteinane som skal fellast inn, og skjera ut i tre og greida allslags kunstarbeid.

⁶Og til hjelpesmann hev eg gjeve han Oholiab, son åt Akisamak, av Dans-ætti, og i hjarta åt alle hage menner hev eg lagt visdom, so dei kann laga alt det eg hev sagt deg:

⁷møtetjeldet, kista til vitnemålet og nådestolen som skal vera yver henne, og all husbunaden i tjeldet,

⁸bordet med alt som til det høyrer og gull-ljosestaken med alt det som høyrer til den, og røykofferaltaret,

⁹og brennofferaltaret med alt som høyrer attåt, og balja med foten under,

¹⁰og embetsskrudet, og den heilage klædebunaden åt Aron, presten, og presteklædi åt sønene hans,

¹¹og salvingsoljen og den angande røykjelsen til heilagdomen. Dei skal i eitt og alt gjera so som eg hev sagt deg.

¹²Og Herren tala til Moses og sa:

¹³Tala du til Israels-borni og seg: Gløym no ikkje å halda sabbatane mine! For det skal vera eit merke millom meg og dykk frå ætt til ætt, so de skal vita at eg er Herren som helgar dykk.

¹⁴Difor skal de halda sabbaten; han skal vera dykk heilag. Den som vanhelgar han, skal visst og sant lata livet; kvar mann som då gjer noko arbeid, han skal rydjast ut or folket sitt.

¹⁵Seks dagar lyt de arbeida og vera onnuge, men den sjuande dagen skal det vera høgheilag sabbat, heilag for Herren. Kvar den som hev noko arbeid fyre seg på sabbatsdagen, skal døy.

¹⁶So skal då Israels-borni koma i hug sabbaten, so dei held han ætt etter ætt; det skal vera ei pakt i all æva.

¹⁷Han skal vera eit æveleg merke millom meg og Israels-borni. For i seks dagar skapte Herren himmelen og jordi, men den sjuande dagen kvilde han og heldt seg roleg.

¹⁸Då han hadde tala til endes med Moses på Sinaifjellet, gav han honom dei tvo vitnemålstavlone; det var steintavlor som Gud hadde skrive på med fingeren sin.