Read nynorsk 1938 Andre Mosebok 37 Bible Online

Andre Mosebok 37 - nynorsk 1938 bible

Andre Mosebok 37

¹So gjorde Besalel kista. Ho var av akasietre, halvtridje aln lang, halvonnor aln breid og halvonnor aln høg.

²Han klædde henne med skirt gull både innan og utan, og gjorde ein gullkrans på henne rundt ikring.

³Og han støypte fire gullringar, som han feste i dei fire føtene på kista, tvo på den eine sida og tvo på den andre.

⁴So gjorde han stenger av akasietre og klædde dei med gull

⁵og smøygde dei inn i ringane på sidone av kista til å bera henne etter.

⁶So gjorde han ein nådestol, av skirt gull, halvtridje aln lang og halvonnor aln breid.

⁷På endane av den gjorde han tvo kjerubar; av drive gull gjorde han dei

⁸den eine kjeruben ytst på den eine enden og den andre ytst på hin enden; i eitt med nådestolen gjorde han kjerubane, ein på kvar ende.

⁹Kjerubane heldt vengene utbreidde og upplyfte, so dei tekte yver nådestolen med vengene sine, og andleti deira snudde mot kvarandre; dei vende augo mot nådestolen.

¹⁰So gjorde han bordet; det var av akasietre, tvo alner langt og ei aln breidt og halvonnor aln høgt.

¹¹Han klædde det med skirt gull og gjorde ein gullkrans på det rundt ikring.

¹²Rundt um det gjorde han ei list so breid som ei hand, og på listi sette han og ein gullkrans som gjekk heilt ikring.

¹³So støypte han fire gullringar og sette i hyrno på dei fire bordføtene.

¹⁴Ringane sat tett uppmed listi, dei var til å smøygja berestenger inn i.

¹⁵Stengene gjorde han av akasietre og klædde dei med gull; dei var det bordet skulde berast etter.

¹⁶So gjorde han dei kjeraldi som skulde setjast på bordet, fati og skålene som høyrde til, og bollane og kannone som skulde skjenkjast drykkoffer av, alt av skirt gull.

¹⁷So gjorde han ljosestaken; den var av skirt gull, og drive arbeid var det, både hoven og leggen. På staken var det blomar med knuppar og utsprotne blad, og dei var samgjorde med han.

¹⁸Seks armar greina seg ut ifrå han, tri på den eine sida og tri på den andre.

¹⁹På den eine armen var det tri utsprotne mandelblomar med knupp og blad, og på den andre armen var og tri utsprotne mandelblomar med knupp og blad, og soleis på alle dei seks armane som greina seg ut ifrå ljosestaken.

²⁰På sjølve staken var det fire utsprotne mandelblomar med knupp og blad,

²¹ein blomsterknupp under dei fyrste tvo armane, og ein under dei neste tvo armane, og ein under det tvo øvste armane - ein knupp under kvart par av dei seks armane som greina seg ut ifrå ljosestaken.

²²Både blomsterknuppane og armane var samsmidde med staken; alt var eit heilgjort arbeid av drive, skirt gull.

²³Sidan gjorde han lampone til ljosestaken, sju i talet, og saksene og saksplatone som høyrde til, alt av skirt gull.

²⁴Ein talent skirt gull bruka han til ljosestaken og alle gognene som høyrde til.

²⁵So gjorde han røykofferaltaret av akasietre, ei aln langt, ei aln breidt, firkanta, og tvo alner høgt. Horni på det var i eitt med sjølve altaret.

²⁶Han klædde det med skirt gull både ovanpå og rundt ikring på sidone og på horni, og gjorde ein gullkrans på det heilt ikring.

²⁷Nedanfor kransen på dei tvo sidone sette han tvo gullringar, tvo på kvar sida, til å smøygja stenger inn i, som altaret skulde berast etter.

²⁸Stengene og gjorde han av akasietre og klædde dei med gull.

²⁹So laga han den heilage salvingsoljen og den reine, angande røykjelsen, på same måten som salveblandarane gjer det.