Read nynorsk 1938 Andre Mosebok 39 Bible Online

Andre Mosebok 39 - nynorsk 1938 bible

Andre Mosebok 39

¹Av den blå og purpurraude og karmosinraude ulli gjorde dei embetsskrudet til tenesta i heilagdomen og laga den heilage klædebunaden åt Aron, soleis som Herren hadde sagt Moses fyre.

²Messehakelen gjorde dei av gull og blå og purpurraud og karmosinraud ull og fint tvinna lingarn.

³Dei hamra gullet ut i plator og klypte det upp til tråd, so det kunde virkast inn i den blå og purpurraude og karmosinraude ulli og det fine lingarnet med kunstvevnad.

⁴So gjorde dei aksleband som var feste til kvarandre; med dei vart messehakelen hekta i hop på båe endane.

⁵Beltet som vera på han og halda han i hop, var samvove med han og av same tyet - av gull og blå og purpurraud og karmosinraud ull og fint tvinna lingarn - soleis som Herren hadde sagt Moses fyre.

⁶So ferda dei til onykssteinane og felte dei inn i fatingar av tvinna gull. Namni åt Israels-sønene var inngravne på dei som på ein seglring, /[42]

⁷og dei vart sette på akslebandi åt messehakelen, so dei skulde minna Herren um Israels-borni, soleis som Herren hadde sagt Moses fyre.

⁸So gjorde dei bringeduken. Han var vent rosa liksom messehakelen, med gull og blå og purpurraud og karmosinraud ull og fint tvinna lingarn.

⁹Firkanta gjorde dei bringeduken og tvilagd; ei spann på lengdi og ei spann på breiddi var han og tvilagd.

¹⁰Og fire rader med dyre steinar sette dei på han: I ei rad var ein karneol og ein topas og ein smaragd; det var fyrste radi.

¹¹I den andre radi var ein karfunkel og ein safir og ein diamant,

¹²og i den tridje radi ein hyasint og ein agat og ein ametyst,

¹³og i den fjorde radi ein krysolit og ein onyks og ein jaspis. Dei vart innfelte i fatingar av tvinna gull.

¹⁴Steinane var tolv i talet etter namni åt Israels-sønene, ein for kvart namn; og på kvar stein var namnet åt ei av dei tolv ættene inngrave liksom på ein seglring.

¹⁵So laga dei lekkjor av skirt gull, slyngde som snorer, til bringeduken.

¹⁶Og dei gjorde tvo gullsylgjor og tvo gullringar og sette ringane i kvar sitt hyrna på bringeduken.

¹⁷Dei tvo gullsnorene feste dei i dei tvo ringane som sat i hyrno på bringeduken,

¹⁸og dei hine tvo endane av båe snorene feste dei i dei tvo sylgjone, og sylgjone sette dei på akslebandi åt messehakelen, på framsida.

¹⁹So gjorde dei tvo andre gullringar og sette dei i dei hine tvo hyrno på bringeduken, på den sida som vender inn imot messehakelen.

²⁰Og endå tvo gullringar gjorde dei og sette på båe akslebandi åt messehakelen, nedantil på framsida, der som han vert hekta i hop, ovanfor beltet,

²¹og so batt dei med ei blå ullsnor ringane på bringeduken i hop med ringane på messehakelen; so bringeduken sat ovanfor beltet og ikkje kunde rikkast frå messehakelen, soleis som Herren hadde sagt Moses fyre.

²²So gjorde dei prestekjolen som var til å bera under messehakelen; han var voven og all igjenom av blå ull.

²³Midt på prestekjolen var det eit halssmog som på ei brynja, og kringum halssmoget ei borda, so han ikkje skulde rivna.

²⁴I falden på kjolen nedantil sette dei granateple av tvinna blått purpurraudt og karmosinraudt ullgarn,

²⁵so gjorde dei bjøllor av skirt gull og sette rundt ikring på kjolefalden, millom granatepli:

²⁶fyrst ei bjølla og eit granateple, so ei bjølla og eit granateple att, og soleis rundt heile kjolefalden, til å bruka ved gudstenesta, soleis som Herren hadde sagt Moses fyre.

²⁷So gjorde dei vovne underkjolar av fint lin til Aron og sønene hans,

²⁸og ei huva av fint lin og prydelege hovudplagg av fint lin og lereftsbrøker av fint tvinna lingarn,

²⁹og eit belte av fint, tvinna lingarn og blå og purpurraud og karmosinraud ull med utsauma rosor, soleis som Herren hadde sagt Moses fyre.

³⁰So gjorde dei gullspongi, det heilage hovudgullet og på den grov dei inn som i ein seglring: Helga til Herren,

³¹og dei sette ei snor av blå ull i henne og feste henne ovantil på huva, soleis som Herren hadde sagt Moses fyre.

³²No var det ferdigt alt det som skulde arbeidast åt tabernaklet, møtetjeldet, og Israels-borni hadde i eitt og alt gjort det soleis som Herren hadde sagt Moses fyre.

³³So kom dei då til Moses med tabernaklet: tjeldet med alt det som høyrde til det: krokane og plankane og tverrstengene og stolpane og stabbane

³⁴og det raudleta verskinnstaket og takasskinns-taket og forhengteppet,

³⁵vitnemålskista med berestengene og nådestolen,

³⁶bordet med alle dei ting som høyrde til det, og skodebrødi,

³⁷gull-ljosestaken med lampone som skulde setjast i rad og alt anna som høyrde til, og oljen til ljosestaken,

³⁸gullaltaret og salvingsoljen, den angande røykjelsen og teppet til tjelddøri,

³⁹koparaltaret med kopargrindi og berestengene og alt anna som høyrde attåt, balja og foten ho skulde standa på,

⁴⁰umhengi til fyregarden med stolpane og stabbane som høyrde til, og teppet til fyregardsporten og togi og pålane og alt det som skulde brukast til tenesta i tabernaklet, i møtetjeldet,

⁴¹embetsskrudet til tenesta i heilagdomen, den heilage klædebunaden til Aron, presten, og presteklædi til sønene hans.

⁴²Som Herren hadde sagt Moses fyre, heiltupp soleis hadde Israels-borni gjort alt arbeidet.

⁴³Og Moses skoda heile verket, og då han såg at det var ferdigt, og at dei i alle måtar hadde gjort det soleis som Herren hadde sagt, so velsigna han dei.